Hefur áhyggjur af ítökum Gamma

Formaður Félags fasteignasala hefur áhyggjur af ítökum sjóðsstýringarfyrirtækisins Gamma á íbúða- og leigumarkaði.

Dagur B. Eggertsson borgarstjóri segist ekki hafa skoðun á viðskiptum einstakra fyrirtækja en áform meirihlutans í borginni um byggingu 3000 nýrra leiguíbúða miði að því að koma jafnvægi á leiguverð í borginni.

Sjóðsstýringarfyrirtækið Gam Management hf. eða Gamma rekur fasteignasjóðina Centrum og Eclipse sem hafa keypt upp mikið af íbúðum á höfuðborgarsvæðinu. Fyrirtækið leigir út íbúðir þessara sjóða í gegnum fyrirtækið Leigufélag Íslands.

Stofnendur Gamma, Agnar Tómas Möller og Gísli Hauksson, gegnum félagið Ægi Invest ehf., eiga báðir sinn 26 prósenta hlutinn í fyrirtækinu. Þá á MP banki 26,8 prósent en óþekktir hluthafar eiga 21 prósent. Fyrr á þessu ári var greint frá því að MP banki hefði selt hlut sinn í Gamma en upplýsingar um uppfært eignarhald hafa ekki verið færðar í fyrirtækjaskrá.  

Eiga mörg hundruð íbúðir

Sjóðir Gamma eiga nú mörg hundruð íbúðir á höfuðborgarsvæðinu. Hér má sjá lista (sjá myndskeið) yfir íbúðir í eigu sjóðsins Eclipse, en eins og sést er þetta í öllum hverfum. Það eru viðskiptavinir Gamma, hlutdeildarskírteinishafar í sjóðunum, sem eru eiginlegir eigendur sjóðanna. 

„Þeir hafa verið að safna eignum, sérstaklega miðsvæðis, en eru nú í auknum mæli að færa sig út í úthverfin. Þeir eru á leigumarkaði og hann ætti að segja til um það líka (leiguverðið innsk. blm) og maður heyrir að leiguverð hafi hækkað allverulega í eignum sem þeir eru með í útleigu. Þeir geta haft áhrif á fasteignaverð og leiguverð í þeirri stöðu sem þeir eru að ná á fasteignamarkaði,“ segir Ingibjörg Þórðardóttir formaður Félags fasteignasala. 

Ingibjörg segir að fram heldur sem horfir verði Gamma í mjög sterkri stöðu en fyrirtækið hefur áform um kaup og byggingu á 850 íbúðum til viðbótar á höfuðborgarsvæðinu. 

„Það er augljóst að Gamma er ekki líknarfélag. Þeir eru í þessu sem viðskiptamódel og þeir eru að hámarka sínar inntektir. Það er bara staðreynd málsins.“

Gísli Hauksson forstjóri Gamma gaf ekki kost á viðtali en vísaði því alfarið á bug að Gamma væri í markaðsráðandi stöðu á íbúðamarkaði og hafnaði ásökunum um að hafa keyrt upp leiguverð.

Hefur áhyggjur af stöðu leigumarkaðar

Núverandi meirihluti í borgarstjórn hyggst hefja uppbyggingu á 3000 leigu og búseturréttaríbúðum á næstu fimm árum. Inni í þeirri tölu eru ekki þær íbúðir sem Gamma ætlar að byggja í Reykjavík.

Samkvæmt lögmálum framboðs og eftirspurnar ætti að komast jafnvægi á leiguverð með auknu framboði íbúða á leigumarkaði. 

„Bygging þessara íbúða er út af fyrir sig hafin. Það eru nokkur verkefni komin af stað, en ég treysti mér ekki til að spá fyrir um þróun fasteignaverðs. Það sem við vitum hins vegar er að þessi viðbót inn á markaðinn mun hafa temprandi áhrif á þá hækkun sem spáð hefur verið. Hversu mikil eða hvenær hún kemur fram treysti ég mér ekki til að spá um,“ segir Dagur B. Eggertsson borgarstjóri Reykjavíkur.

Dagur segir slæmt ef einstakir aðilar verði markaðsráðandi á leigumarkaði en segir að borgin taki ekki afstöðu til einstakra fyrirtækja, eins og Gamma.

„Ég hef ekkert leynt því að ég hef áhyggjur af stöðu leigumarkaðar og þess vegna erum við í þessum verkefnum,“ segir Dagur.