Hálfri milljón safnað á nokkrum klukkutímum: "Þykir mjög vænt um að finna fyrir þessum stuðningi“

„Ég skil ekki hvaðan þessi velvild er öll sömul komin,“ segir vísindamaðurinn Sævar Helgi Bragason í samtali við Vísi. Frá því var greint í gær að Stjörnufræðivefur Sævars Helga væri komin í gjaldþrot en ástæðuna má rekja til kaupa vefsins á sólmyrkvagleraugum fyrir grunnskólabörn landsins í mars í fyrra.

Sævar ræddi málin í Brennslunni á FM 957 í morgun. Viðtalið má heyra hér að ofan.

Sævar Helgi útskýrði í samtali við Vísi í gær að misskilningur á milli hans og endurskoðanda hans hefði verið að ræða. Vefurinn skuldaði 450 þúsund krónur í virðisaukaskatt sem væri ástæða þess að vefurinn var úrskurðaður gjaldþrota.

Skemmst er frá því að segja að síðan tíðindi af gjaldþrotinu voru flutt í fjölmiðlum í gær er staðan breytt. Fólk úr öllum áttum hefur lagt peninga inn á reikning Sævars Helga og þegar Sævar athugaði stöðuna í gærkvöldi höfðu rúmlega 450 þúsund krónur safnast.

Sólmyrkvann í fyrra má sjá í myndbandinu að neðan.

Hálft tonn af sólmyrkvagleraugum

„Ég er á leiðinni til endurskoðandans fljótlega og sjá hvað hægt er að gera,“ segir Sævar Helgi glaður í bragði. Fjölmargir hafi spurt hann í gær hvernig það gæti lagt sitt af mörkum og hafi hann bent því á reikningsnúmer vefsins þar sem hægt væri að styrkja hann.

„Það fór aldeilis á flug,“ segir Sævar sem átti eftir að skoða stöðuna í dag. „Ef það kemur eitthvað meira, sem mig grunar, mun allt aukalega verða notað í frekara fræðslustarf,“ segir Sævar Helgi sem sá til þess að 70 þúsund sólmyrkvagleraugu rötuðu til grunnskóla landsins í aðdraganda sólmyrkvans í fyrra.

Sævar Helgi segist hafa orðið var við að fólk deildi fréttum af gjaldþrotinu í gær og greinilegt að margir vildu hjálpa. Hann hafi ætlað að greiða þetta sjálfur en hann sé afskaplega þakklátur að þurfa ekki að gera það.

Vill sjónauka í alla grunskóla

„Manni líður stundum eins og maður sé einn í öllu og þykir mjög vænt um að finna fyrir þessum stuðningi. Ég kann þessu fólki bestu þakkir fyrir og veit ekki hvernig ég get þakkað því nægjanlega,“ segir Sævar. Hann vonast til þess að vesenið með skattinn verði úr sögunni en viðurkennir að hann viti ekki neitt um það hvernig þau mál gangi fyrir sig.

„Mér skilst að skatturinn geti verið harður í horn að taka en ég vona að þeir sjái aumur á manni. Þetta eru ekki stjarnfræðilegar upphæðir.“

Aðspurður um næstu verkefni segist Sævar Helgi áfram vilja efla vísindastarf í skólum hér á landi. Næsti draumur sé að útvega öllum grunnskólum sjónauka til að geta skoðað sólina.

„Það væri stærðarinnar verkefni,“ segir Sævar Helgi. Þá geti krakkarnir skoðað hvernig sólin snýst, séð hvernig sólblettir breytast, fylgst með virku svæðunum þar sem sprengingar verða sem að einhverjum tíma liðnum valda norðurljósum.

„Það þarf að halda áfram að efla vísindastarf. Ekki eru sveitarfélögin og ríkið að standa sig.“