Hafa átt í viðræðum um sölu á Greifanum

Eigendur FoodCo hafa átt í viðræðum vegna sölu á veitingastaðnum Greifanum á Akureyri. Þetta staðfestir Jóhann Örn Þórarinsson, forstjóri og einn eigenda FoodCo, í samtali við Vísi.

Sú frétt hefur gengið á Facebook í dag að FoodCo hafi selt Greifann á Akureyri en Jóhann Örn segir það vera uppspuna. „Við eigum staðinn í dag og rekum staðinn í dag og munum gera það á morgun,“ segir Jóhann en fullyrt er á vefnum Kaffid.is að Greifinn hafi verið seldur.

Kaffið heldur því fram að starfsmönnum Greifans hafi verið tilkynnt um söluna á jólagleði þeirra í gærkvöldi og er vitnað Arinbjörn Þórarinsson, framkvæmdastjóra Greifans, sem segist taka yfir rekstur veitingastaðarins um leið og kaupin ganga í gegn.

Greifinn var opnaður á Akureyri árið 1990 en FoodCo keypti staðinn árið 2006 og hefur rekið hann síðan.

Ásamt Greifanum rekur FoodCo Eldsmiðjuna, Saffran, American Style, Pítuna, Aktu Taktu og Roadhouse.