Innlent

Gleymdi hundunum í læstum bíl í steikjandi hita við Fífuna

Stefán Ó. Jónsson skrifar
Hundarnir voru fullvaxta og af gerðinni Golden Retriever
Hundarnir voru fullvaxta og af gerðinni Golden Retriever Vísir
Lögreglan í Kópavogi var kölluð til á fjórða tímanum í dag eftir að vegfarendur tilkynntu um tvo Golden Retriever hunda sem læstir voru inn í bifreið við íþróttamiðstöðina Fífuna.

Engar rifur voru á gluggum bílsins og í glampandi sólskininu myndaðist gríðarlegur hiti í bílnum en lofthiti var þá um 18 gráður. Að sögn sjónarvotta voru hundarnir aðframkomnir af hita og másuðu mikið.

Vegfarandi sem Vísir náði tali af var í rúmlega klukkustund að reyna að hafa upp á eigendum bílsins meðan hundarnir sátu þar enn læstir inn. Því hafi lögreglunni verið gert viðvart.

Eigandi hundanna hafði verið að fylgjast með Símamótinu í knattspyrnu sem fram fer við Fífuna þessa dagana.

Ráða illa við mikinn hita

Dýraverndunarsamtök á Norðurlöndum vara gæludýraeigendur reglulega við því að skilja dýr sín eftir í bílnum nú yfir sumartímann þar sem þeir geti drepist úr hita.

Dönsku dýraverndarsamtökin Dyrefondet hafa sagt að þetta sé vaxandi vandamál þar í landi og að árlega berist fregnir af hundum sem látið lífið eftir að hafa gleymst í bílum.

Yfir sumartímann, þegar heitast er og sólin skín, getur hitinn í bílnum hlaupið á tugum gráða og það þoli hundar ekki. Því segir talsmaðurinn samtakana það vera betra fyrir fólk að skilja hundinn eftir heima í stað þess að kvelja hann í bílnum.



 




Fleiri fréttir

Sjá meira


×