Innlent

Hótaði að ræna sjoppuna þegar hann væri búinn með sam­lokuna

Atli Ísleifsson skrifar
Atvikið átti sér stað í sjoppu á Akureyri aðfararnótt laugardags í apríl 2022.
Atvikið átti sér stað í sjoppu á Akureyri aðfararnótt laugardags í apríl 2022. Vísir/Vilhelm

Héraðsdómur Norðurlands eystra hefur dæmt karlmann í þrjátíu daga fangelsi fyrir hótanir í garð afgreiðslukonu í sjoppu á Akureyri í apríl 2022. Í dómi kemur fram að hann hafi meðal annars hótað að drepa konuna.

Í ákæru segir að maðurinn hafi hótað að ræna sjoppuna, „þegar hann væri búinn með samlokuna sína, en hann hafði keypt samloku skömmu áður en hann setti fram þessar hótun.“

Ennfremur segir að við þetta hafi afgreiðslukonan orðið hrædd og kallað eftir aðstoð fólks sem hafi verið innar í húsinu. Þá hafi maðurinn hótað að drepa hana ef hún léti vita af honum. Sagðist hann vita hver hún væri og hvar hún ætti heima. Segir í ákæru að með orðum sínum og hegðun hafi hann vakið hjá konunni ótta um líf sitt, heilbrigði eða velferð sína og annarra.

Maðurinn kom fyrir dóm þar sem hann játaði sök samkvæmt ákæru.

Maðurinn hefur hreinan sakaferil og var hæfileg refsing metin þrjátíu daga fangelsi en fresta skal fullnustu refsingarinnar og hún niður falla, haldi maðurinn skilorð í tvö ár.

Dómsmál Akureyri
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið