SaltPay fjárfestir í Dineout

Eiður Þór Árnason skrifar 4. mars 2022 10:31

Tinnu Sigurðardóttur, stofnandi og einn eigandi Dineout. Aðsend

Fjármálafyrirtækið SaltPay hefur fjárfest í Dineout og er komið inn í eigendahóp fyrirtækisins. Samningur þess efnis var undirritaður í dag.

Að sögn Dineout verður fjármagnið meðal annars nýtt í að styrkja stöðu fyrirtækisins á Íslandi enn frekar ásamt því að sækja á erlenda markaði. Þetta kemur fram í tilkynningu frá Dineout en samhliða fjármögnun SaltPay hyggst Dineout ráða inn starfsfólk á næstu vikum. Ekki er upplýst um umfang fjárfestingarinnar.

Eigendahópurinn samanstendur nú af Ingu Tinnu Sigurðardóttur, stofnanda og hugmyndasmiðs fyrirtækisins, Tix miðasölu ehf., Magnúsi Birni Sigurðssyni, Viktori Blöndali Pálssyni ásamt SaltPay. Stjórn Dineout verður skipuð af Sindra Má Finnbogasyni, stofnanda Tix Miðasölu, Ingu Tinnu Sigurðardóttur auk eins stjórnarmeðlims frá SaltPay í Bretlandi.

25 þúsund sótt Dineout appið

Þrjú ár eru frá því að borðabókunarkerfi Dineout kom á markaðinn. Að sögn stjórnenda er heildarfjöldi borðabókana tæplega 1,8 milljónir frá upphafi og eru nú um 170 veitingastaðir í viðskiptum við Dineout. Um 90 þúsund heimsóknir séu inn á vef Dineout í hverjum mánuði og um 25.000 manns sótt sér Dineout Iceland appið.

Í dag býður Dineout einnig upp á matarpöntunarkerfi, kassakerfi, heimasíðugerð og sjálfvirkar greiðslur með QR-kóðum. Lausnir Dineout verða innleiddar í Noregi í næsta ári og stefnir fyrirtækið á frekari útrás.

Að sögn Dineout hafa síðustu mánuðir meðal annars farið í að tengja saman lausnir Dineout við Tix miðasölukerfið. Niðurstaðan sé heildarlausn fyrir tónleikahallir, kvikmyndahús og leikhús.

„Tix starfar nú í 9 löndum og mun þessi nýja heildarlausn fara í notkun í Noregi í næsta mánuði. Klár stökkpallur fyrir Dineout í útrás á erlenda markaði ásamt því að um einstaka lausn er að ræða á evrópskum markaði og í raun á heimsvísu. Tónleikahallir, kvikmyndahús og leikhús hafa kallað eftir einni lausn sem býður upp á miðasölu, kassakerfi og matarpantanir og ný sameinuð lausn Tix og Dineout leysir þessa þörf.“

„Fjármögnun SaltPay er gríðarlega spennandi og frábært að fá þá inn í eigendateymið,“ segir Inga Tinna í tilkynningu.

Tækni Veitingastaðir

Tengdar fréttir

„Ég fékk oft að heyra að þetta væri nú frekar bjartsýnt hjá mér“

„Ég hafði stofnað fyrirtækið Icelandic Coupons, sem er afsláttarapp fyrir ferðamenn og Íslendinga árið 2015. Í þeirri vegferð var ég mikið að funda á veitingahúsum landsins. Mér fannst ótrúlegt að sjá hvað voru margar aðferðir notaðar við að halda utan um borðabókanir. Sumir voru með stílabækur, aðrir voru að notast við Word í tölvum og enn aðrir við erlend bókunarforrit og svo framvegis,“ segir Inga Tinna Sigurðardóttir framkvæmdastjóri Dineout um aðdragandann að því að Dineout var stofnað.

13. september 2021 07:01

Dineout í útrás með aðstoð Tix

Hugbúnaðarfyrirtækið Dineout hefur tryggt sér fjármögnun frá miðasölufyrirtækinu Tix EU sem kemur inn sem hluthafi. Forstjóri og einn stofnenda Dineout, sem heldur úti hugbúnaðarlausnum fyrir veitingastaði og hótel, segir að samstarfið muni hjálpa fyrirtækinu í útrás sinni á erlenda markaði.

4. ágúst 2021 23:47

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir