Úrslitaleikurinn þýðir að Chelsea sé betra en Arsenal

Maurizio Sarri segir Chelsea hafa náð betri árangri en Arsenal á tímabilinu þar sem hans menn spila í úrslitaleik deildarbikarsins.

Bæði lið eru með 50 stig í ensku úrvalsdeildinni, eru úr leik í ensku bikarkeppninni en í 16-liða úrslitum Evrópudeildarinnar. Chelsea spilar hins vegar til úrslita í deildarbikarnum á morgun.

„Það er mikilvægt að vinna úrslitaleikinn,“ sagði Sarri. „Það er mjög mikilvægt fyrir okkur að finna sjálfstraustið aftur.“

„Við erum í fyrsta úrslitaleik tímabilsins og einu stigi frá fjórða sætinu.“

Chelsea var niðurlægt af Manchester City á dögunum 6-0 á heimavelli og hefur ekki verið að spila vel í síðustu leikjum.

„Tímabilið hjá Arsenal er gott en okkar er aðeins betra afþví við erum í úrslitaleik. Samt er tímabilið okkar algjör hörmung? Ég skil þetta ekki,“ sagði Sarri á blaðamannafundi fyrir leikinn.

„Ég vil minna ykkur á að síðustu tvö tímabil náði þetta lið 70 stigum, ekki 100. Við gjörbreyttum öllu í sumar, það er ekki auðvelt.“