Innlent

Bjarni og Guðlaugur Þór funduðu með Sigmundi vegna áhuga Gunnars Braga á að starfa á erlendum vettvangi

Jóhann K. Jóhannsson skrifar

Fjármála- og efnahagsráðherra staðfestir í samtali við fréttastofu að hann, ásamt utanríkisráðherra, hafi nýverið fundað með Sigmundi Davíð Gunnlaugssyni um áhuga Gunnars Braga Sveinssonar á að starfa á erlendum vettvangi.

Mikið hefur verið rætt um þau orð Gunnars Braga Sveinssonar á upptökunum sem snúa að meintum pólitískum hrossakaupum. Þannig hefði skipun Geirs H. Haarde í embætti sendiherra verið gegn því að Gunnar Bragi ætti inni svipaðan greiða hjá Sjálfstæðisflokkum. Þau orð bar Gunnar Bragi síðar til baka.

Á vef Kvennablaðsins í gær er umræðu þingmannanna um þessi mál á upptökunum haldið áfram og er sagt að Sigmundur hafi hitt Bjarna Benediktsson fjármála- og efnahagsráðherra og Guðlaug Þór Þórðarson utanríkisráðherra til þess að ræða áhuga Gunnars Braga á því að starfa á erlendum vettvangi.

Bjarni Benediktsson fjármála- og efnahagsráðherra. vísir/vilhelm.

Fundur haldinn að frumkvæði Sigmundar

Bjarni staðfesti við fréttastofu í dag að þetta samtal hafi átt sér stað á fundi þeirra þriggja sem var haldinn að frumkvæði Sigmundar.

„Í tilviki Gunnars Braga, að þá hef ég skilið það svo að það væri eitthvað sem kæmi til greina af hans hálfu. Um það var rætt á þessum fundi,“ sagði Bjarni Benediktsson í samtali við fréttastofu í dag.

Þannig að þú hefur átt fund og Guðlaugur Þór var með ykkur með ykkur á þeim fundi?

„Já, við sátum þrír saman á slíkum fundi og þannig var það í þinginu,“ sagði Bjarni.

Er þetta gegn greiða eftir að Geir H. Haarde var skipaður í stöðu sendiherra af Gunnari Braga á sínum tíma?

„Nei, þetta er það ekki. Ég er búinn að koma því mjög rækilega á framfæri, margoft, að ég skulda engum neina slíka greiða vegna þeirrar skipunar,“ sagði Bjarni.
 

Hornborið á Klaustri þar sem þingmennirnir sex sátu að kvöldi 20. nóvember síðastliðinn. Vísir/SÓJ

Sex dagar síðan Anna Kolbrún sagðist íhuga stöðu sína

Málefni þingmannanna sex á Klausturbarsupptökunum eru enn áberandi í fjölmiðlum en í dag var því haldið fram að þingmaður Miðflokksins hefði gefið rangar upplýsingar í æviágripi sínu á vef Alþingis.

„Forseti vill taka fram vegna fjölmiðlaumfjöllunar sem orðið hefur um æviferilsskrá háttvirts þingmanns Önnu Kolbrúnar Árnadóttur, að það mál hefur verið athugað af hálfu Alþingis og er niðurstaða þess skýr að háttvirtur þingmaður hefur í einu og öllu tilgreint réttar upplýsingar um sinn æviferil,“ sagði Steingrímur J. Sigfússon í upphafi þingfundar í dag.

Þroskaþjálfafélag Íslands og Félag sérkennara á Íslandi sendu frá sér tilkynningar um staðreyndarvillur í ferilskrá þingmannsins á vefsíðu Alþingis en þar var tilgreint að Anna Kolbrún hefði titlað sig sem þroskaþjálfa og að hún hefði verið ritstjóri fagtímarits Félags sérfræðikennara á Íslandi. Forseti þingsins skýrði rangfærslurnar með þessum hætti.

„Þá skráði háttvirtur þingmaður það ekki inn, heldur hefði innskráning skrifstofunnar mátt vera skýrari varðandi það atriði,“ sagði Steingrímur. 

Anna Kolbrún Árnadóttir vildi lítið ræða við fréttamann á leið sinni frá nefndarsviði Alþingis og yfir í þinghúsið í gær Vísir/Vilhelm

Anna Kolbrún hefur mikið verið til umfjöllunar síðustu vikuna eftir að hljóðupptaka með henni og fimm öðrum þingmönnum var lekið til fjölmiðla þar sem þau fóru ófögrum orðum um samstarfsmenn sína á þingi og annað fólk í þjóðfélaginu.

Frá því upptökurnar voru gerðar opinberar fyrir sex dögum hefur Anna verið að íhuga stöðu sína sem þingmaður og samkvæmt upplýsingum fréttastofu hefur hún ekki enn tekið ákvörðun um hvort hún stígi til hliðar.


Tengdar fréttir

Sunna segir Önnu Kolbrúnu hafa verið litla í sér

Fundi formanna þingflokkanna með forseta Alþingis lauk á skrifstofum Alþingis á tólfta tímanum. Þórhildur Sunna Ævarsdóttir, þingflokksformaður Pírata, sagði að nefndin væri einhuga um meðferðina sem málið ætti að fara.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.