Íslenski boltinn

Ásgeir Börkur yfirgefur Fylki

Anton Ingi Leifsson skrifar
Ásgeir Börkur hefur yfirgefið hreiðrið, Árbæin.
Ásgeir Börkur hefur yfirgefið hreiðrið, Árbæin. vísir/vilhelm

Ásgeir Börkur Ásgeirsson er á förum frá Fylki en hann tilkynnti þetta í yfirlýsingu á Facebook-síðu sinni fyrr í dag.

Ásgeir er uppalinn í Árbænum en hann hefur leikið 274 leiki fyrir meistaraflokk félagsins í Pepsi-deild karla og Inkasso-deildinni á síðustu leiktíð.

Ásgeir hefur lengi vel verið með fyrirliðabandið í Árbænum en lét það af hendi í sumar er Ólafur Ingi Skúlason kom aftur heim í Árbæinn eftir atvinnumennsku.

Ferlinum er þó ekki lokið hjá Ásgeiri enda einungis 31 árs. Hann segir í yfirlýsingu sinni eiga nóg eftir og að hann sé spenntur fyrir næstu áskorun en framhaldið sé þó óljóst.

Yfirlýsing Ásgeirs í heild sinni:
Ég held að þessi mynd lýsi vel sirka 26 ára ferli mínum sem fótboltamanni hjá Fylki. Endalaust að rífa kjaft hvort sem það var inn á vellinum eða utan og ég hefði ekki viljað hafa það neitt öðruvísi! Það voru fáir sem hefðu trúað því að ég, gjörsamlega óuppalandi og óferjandi á yngri árum, myndi enda með að spila 274 meistaraflokksleiki fyrir klúbbinn minn og bera fyrirliðabandið stoltur í tæp þrjú ár. En það gerðist. Ef til vill skrifast það meira á þrjósku og ástríðu, en hæfileika.

Það sem stendur helst upp úr á þessum 26 árum er hversu mörgu góðu fólki ég hef kynnst á leiðinni. Fyrst og fremst fékk ég að spila fótbolta með bestu vinum mínum og það eitt og sér eru forréttindi. Auk þess fékk ég að læra af mörgum ólíkum einstaklingum hvort sem það voru uppaldir og ungir Fylkismenn, goðsagnir hjá klúbbnum eða aðkomumenn. Að fá að þroskast og dafna sem einstaklingur hjá mínu uppeldisfélagi er þakkarvert og verð ég að eilífu þakklátur fyrir það!

En ég á nóg eftir og er spenntur fyrir næstu áskorun! Framhaldið er óljóst, en ég verð einhverstaðar að sparka í fótbolta næstu árin. Það er klárt!

Vil óska þjálfurum, starfsliði og leikmönnum Fylkis áframhaldandi góðs gengis! Það er allt til alls í Árbænum, nú er bara, svo ég vitni í Einar Ásgeirsson vin minn: “KOMA SVO. TAKA’ETTA NÚ!”



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.