Lífið

Íslendingar greiða sexfalt verð fyrir nýjasta Múmínmálið

Stefán Ó. Jónsson skrifar
Fallegir bollar, því er ekki að neita.
Fallegir bollar, því er ekki að neita. Moomin

Íslenskir aðdáendur Múmínmálanna eru tilbúnir að greiða margfalt uppsett verð til að bæta nýjasta bollanum í safnið. Málið var gefið út í tilefni alþjóðlega Múmíndagsins, sem haldinn var hátíðlegur í gær. Bollinn er fölbleikur á lit og sýnir tvo Múmínálfa í faðmlögum fyrir framan sólarlagið, eins og sjá má á myndinni hér að ofan.

Upplagið af málinu var gríðarlega takmarkað og aðeins fáanlegt í einn sólarhring, frá miðnætti 9. ágúst til síðastliðins miðnættis, á völdum sölustöðum Múmínbollanna sem og í opinberri netverslun Múmínálfanna. Uppsett verð voru 29,90 evrur, eða rúmlega 3700 krónur. Áhuginn var gríðarlegur og mynduðust langar biðraðir við fjöldamörg Múmínútibú í Skandinavíu. Bollarnir seldust upp á svipstundu og sátu margir Múmínáhangendur eftir með sárt ennið.

Þeir þurfa því nú að reiða sig á eftirmarkaðinn og eru íslenskir Múmínsafnarar þar engin undantekning. Þeir hafa safnast saman í Facebook-hópnum Múmínmarkaðurinn þar sem bollar og annar Múmínvarningur gengur kaupum og sölum.

Langar raðir mynduðust fyrir utan skandinavísk Múmínútibú þegar bollarnir fóru í sölu. Aðsend

Íslenskir Múmínálfar fóru ekki varhluta af útgáfu nýja bollans í gær og sköpuðust heitar umræður um hvernig best væri að nálgast nýja málið. Íslendingur í Gautaborg varð sér út um málið og ákvað að bjóða það upp á Múmínmarkaðnum. Ef marka má viðbrögðin var áhuginn mikill og að endingu seldist bollinn á 20 þúsund íslenskar krónur, sem er næstum því sexfalt söluverð. Seljandanum tókst að verða sér út um fleiri fölbleika bolla, sem hann segir einnig hafa selst á 20 þúsund krónur.

Eftirspurnin eftir fágætum Múmínmálum ætti ekki að koma fólki á óvart sem hefur kynnt sér niðurstöður ritgerðarinnar Kauphegðun Íslendinga : múmínbollar og hjarðhegðun. Eins og nafnið gefur til kynna var rannsóknarefnið áhugi landsmanna á Múmínmálunum og var spurningalisti lagður fyrir meðlimi fyrrnefnda Múmínmarkaðarins.

Sjá einnig: Eftirminnilegustu raðir okkar tíma

Niðurstöðurnar gefa meðal annars til kynna að flestir íslenskir Múmínaðdáendur eru konur, en þær voru alls 99 prósent svarenda. Flestar þeirra áttu á bilinu 6 til 10 Múmínbolla og segir meirihluti þeirra að áhuginn á bollasöfnuninni hafi kviknað eftir að þær höfðu fengið fyrsta málið að gjöf. Margar þeirra safna jafnframt öðrum hlutum, á borð við Ittala-vörum og matarstelli.

Múmínáhangendur verja jafnframt miklum tíma á netinu á hverjum degi, svörin gefa til kynna að 38% þeirra eyði um 3 til 4 klukkustundum á sólarhring í það að vafra um á netinu. Það fær rannsakandann til að leiða sig að þeirri niðurstöðu að áhugann á málunum megi að einhverju leyti rekja til sýnileika bollanna á samfélagsmiðlum, í auglýsingum og í verslunum. Þá séu Íslendingar einnig gjarnir á að fá æði fyrir tilteknum vörum, eins og áhugi landsmanna á Omaggio-vösum og hillum úr Söstrene Grene beri með sér.


Tengdar fréttir

Eftirminnilegustu raðir okkar tíma

Í dag er Black Friday, Svartur föstudagur eða fössari, eða hvað sem auglýsendur kjósa að kalla þennan blessaða dag. Honum fylgir víða um heim mikill verslunartryllingur og raðir og því ætlum við að rifja upp nokkrar slíkar hér á þessum síðum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.