Lífið

Fjögurra ára gömul klippa af kynferðislegri áreitni X Factor-dómara vekur reiði netverja

Kristín Ólafsdóttir skrifar
Mel B stöðvaði að endingu viðtalið og byrsti sig við Walsh.
Mel B stöðvaði að endingu viðtalið og byrsti sig við Walsh. Skjáskot/Youtube

Myndbandsbrot úr viðtali við bresku X Factor-dómarana Mel B, Louis Walsh, Simon Cowell og Cheryl Cole, sem tekið var árið 2014 komst aftur í dreifingu í byrjun vikunnar, fjórum árum eftir að það birtist fyrst. Í myndbandinu sést Walsh, umboðsmaður og framleiðandi, þukla á rassi Mel B, söngkonu og fyrrverandi Kryddpíu, sem bregst ókvæða við, og hefur klippan nú komið af stað umræðu um kynferðislega áreitni.

Vakin var athygli á myndbandinu á Twitter á sunnudag og þegar þetta er skrifað hafa nær 250 þúsund manns „líkað“ við færsluna. Myndbandinu er deilt í tístinu og við það er skrifað „Kynferðisleg áreitni í beinni útsendingu, góðir hálsar.“



Klippuna má einnig sjá með hljóði hér að neðan en þar sést hvernig Walsh hvílir hönd sína á rassi Mel B, sem þykir það bersýnilega óþægilegt, í töluverðan tíma. Að endingu stöðvar Mel B viðtalið og spyr Walsh af hverju hann sé að grípa um afturendann á sér.

Umræddur Twitter-notandi, @dys_nania, bætir því einnig við að þrátt fyrir að atvik á borð við þetta gerist frammi fyrir allra augum neiti menn enn þá að horfast í augu við það hversu oft slík áreitni fer fram á bak við luktar dyr. Sjálf þurfti Mel B að fá nálgunarbann gegn fyrrverandi eiginmanni sínum, Stephen Belafonte, í fyrra en hann mun hafa beitt hana mjög alvarlegu ofbeldi í áraraðir.

Margir taka undir með Twitter-notandanum en aðrir gagnrýna Mel B fyrir viðbrögð hennar. Einn Twitter-notandi sagði hana til að mynda hafa „gert manninn vandræðalegan.“



Youtube-stjörnurnar Ethan og Hila Klein, sem halda úti rásinni H3H3productions, ræddu áreitni Walsh í hlaðvarpsþætti sínum áður en myndbandið fór í dreifingu á Twitter. Þau skipuðu sér í hóp þeirra sem hafa gagnrýnt Walsh harðlega, sem virðist töluvert fjölmennari hópur en þeir sem eru á öndverðum meiði. Upptöku úr hlaðvarpinu má horfa á í spilaranum hér að neðan.

Hvorki Mel B né Walsh hafa tjáð sig um myndbandið, hvorki nú né fyrir fjórum árum. Þá vakti atvikið ekki viðlíka athygli þegar það var sýnt í sjónvarpi árið 2014, enda var umræða í anda #MeToo-hreyfingarinnar þá styttra á veg kominn en árið 2018.

Mel B starfaði sem dómari í bæði bresku og áströlsku þáttaröðum X Factor á árunum 2011-2016. Walsh tilkynnti í júní síðastliðnum að hann hygðist láta af störfum sem dómari þáttanna.


Tengdar fréttir

Sharon Osbourne verður í dómarateyminu í X-Factor

Simon Cowell hefur nú staðfest að Sharon Osbourne verði dómari á nýjan leik í raunveruleikaþáttunum X-Factor Uk en hún var hluti af upprunalegu dómurunum í þáttunum sem hófu göngu sína árið 2004.

Cowell vill aftur gamla gengið

Simon Cowell vill fá Louis Walsh og Sharon Osbourne til að setjast aftur í dómarasætin í raunveruleikaþáttunum X-Factor UK.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira