Formúla 1

Er Alonso loksins að gefast upp á McLaren?

Bragi Þórðarson skrifar
Alonso í kappakstri helgarinnar.
Alonso í kappakstri helgarinnar. vísir/getty

Fernando tók þátt í sínum 300. kappakstri um helgina en varð frá að hverfa vegna vélarbilunar og vilja margir meina að þetta verði síðasta hans síðasta ár í Formúlunni.

Alonso vann heimsmeistaratitil ökuþóra í Formúlu 1 árin 2005 og 2006 með Renault. Síðan þá hefur spænski snillingurinn í rauninni alltaf verið réttur maður á röngum stað.

Eftir titlana með Renault færði Fernando sig yfir til McLaren þar sem að hinn kornungi Lewis Hamilton stal algjörlega senunni.
Spánverjinn ákvað því að snúa aftur til Renault árið eftir en ljóst var að bestu ár franska framleiðandans voru búin. Árið 2010 fékk Alonso tækifæri á að keyra fyrir sigursælasta lið allra tíma, Ferrari.

Fernando eyddi bestu árum ferils sýns hjá Ferrari, en ítalski kappakstursrisinn var þó í gríðarlegri lægð á þessum árum. Landaði því Spánverjinn aðeins 11 sigrum á þeim fimm árum sem hann eyddi á Maranello.

Árið 2015 snéri hann svo aftur til McLaren er breska liðið var nýbúið að gera spennandi samning við vélarframleiðandann Honda. Samstarfið reyndist algjörlega hræðilegt og vantaði vélunum bæði afl og áræðanleika.

McLaren stóð þó alltaf fast á þeirri skoðun að þeirra bíll væri sá besti, vandamálið var bara vélin. Sú fullyrðing er þó greinilega röng þar sem liðið hefur lítið bætt sig þrátt fyrir að keyra með Renault vélar í ár.

Alonso og McLaren eru því ennþá á svipuðum stað og fyrir ári síðan og eru því litlar líkur á að Fernando muni nokkurn tímann vinna annan kappakstur í Formúlu 1.

Vélarbilunin hjá Spánverjanum í kanadíska kappakstrinum um helgina gæti hafa verið dropinn sem fyllti loksins mælinn.

Alonso er nú þegar byrjaður að hugsa um aðra hluti en Formúlu 1 og keppti hann meðal annars í Indy 500 kappakstrinum á síðastliðnu ári.

Í sumar er Fernando að keppa í þolakstri með Formúlunni og mun hann taka þátt í heimsfræga Le Mans kappakstrinum um næstu helgi.

Það er því ljóst að Spánverjinn knái er þegar farinn að hugsa um hvað býður hans eftir að Formúlu ferlinum lýkur. Það er því bara spurning hvort að hinn 36 ára Alonso setji hanskana á hilluna í lok þessa árs eða reynir við eitt árið enn með McLaren.


Tengdar fréttir

Uppgjör eftir Kanada: Kominn tími á breytingar

Sebastian Vettel á Ferrari stóð uppi sem sigurvegari í Formúlu 1 kappakstri helgarinnar á Montreal brautinni í Kanada. Þjóðverjinn náði ráspól í tímatökum á laugardaginn og leiddi alla hringi kappakstursins.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira