Formúla 1

Var næstum því búinn að missa höndina en snýr nú aftur í Formúlu 1

Bragi Þórðarson skrifar
Robert Kubica.
Robert Kubica. Vísir/Getty

Pólverjinn Robert Kubica keppti í Formúlu 1 á árunum 2006 til 2010 og hann er eini pólski ökumaðurinn sem hefur náð sigri í keppni. Hræðilegt slys í rallkeppni fyrir 2011 tímabilið varð til þess að Kubica hefur ekkert keppt í íþróttinni síðan.

Í slysinu skaddaðist hægri hönd Pólverjans alvarlega og leit út fyrir að þyrfti að fjarlægja höndina algerlega. Sem betur fer var það ekki raunin og eftir fjöldamargar aðgerðir getur Kubica nú ekið Formúlu 1 bíl að nýju.

Kubica hefur verið að keppa í heimsmeistaramótinu í rallakstri síðastliðin ár en hefur nú skrifað undir eins árs samning við Williams sem þróunarökumaður.

„Þetta er kannski ekki það sem mig dreymdi um, en þetta kemur mér þó aftur í sportið, í nokkuð mikilvægu hlutverki,“ sagði Pólverjinn en hann mun taka þátt í þremur æfingum liðsins á árinu.

Williams stillir upp yngsta ökumannsteymi af öllum liðum í Formúlunni með þá Lance Stroll, sem er 19 ára, og Sergey Sirotkin, sem er 22 ára. Það var því mikilvægt fyrir liðið að ráða Kubica þar sem Pólverjinn getur hjálpað liðinu verulega með reynslu sinni.

Enska liðið hefur byrjað tímabilið hræðilega og er ljóst að FW41 bíllinn er einfaldlega ekki nógu hraður. Einnig hafa ökumenn liðsins ekki staðið sig nægilega vel sem er kannski skiljanlegt miðað við reynsluleysi þeirra.

Því gæti það vel farið svo að Williams ákveði að leyfa Kubica að spreyta sig í keppni í sumar ef árangur þeirra Sirotkin og Stroll heldur áfram að vera á sömu nótum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.