Innlent

Hlýnar og bætir í vind

Samúel Karl Ólason skrifar
Samkvæmt spákorti Veðurstofunnar stefnir í fínan dag víða um land.
Samkvæmt spákorti Veðurstofunnar stefnir í fínan dag víða um land. Veðurstofa Íslands

Í dag mun hlýna og bæta í vind á landinu og er útlit fyrir „hið þokkalegasta veður“, eins og það er orðað á vef Veðurstofu Íslands. Spáð er austan 5-13 m/s í dag, en allhvasst með suðurströndinni. Í kvöld verður vindurinn hins vegar kominn í austan 10-18 víða á landinu en 18-23 syðst, þar sem búið er að gefa út gula viðvörun.

Gífurlega stór lægð er stödd langt suður í hafi en dreifir hún úr sér yfir stóran hluta Norður-Atlantshafs. Hún beinir til okkar hlýjum loftmassa og mun hiti á vesturhelmingi landsins ná 14 stigum.

„Títtnefnd lægð ræður öllu í veðrinu hjá okkur og í kvöld sendir hún skil að landinu og þá hvessir og bætir í úrkomu. Seint í kvöld má búast við strekkingi eða allhvössum vindi svona heilt yfir, en þá er útlit fyrir storm og snarpar hviður syðst á landinu og við Öræfajökul og varir það ástand fram eftir þriðjudagsmorgni,“ segir í hugleiðingum veðurfræðings, sem fylgir spá dagsins.

Á morgun má búast við því að áfram verði hlýtt miðað við árstíma en þó verður rigning á Suðausturlandi og Austfjörðum.
 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.