Íslenski boltinn

Markvörður Íslands í 14-2 tapinu var sæmdur Heiðurskrossi KSÍ

Óskar Ófeigur Jónsson skrifar
Guðmundur Pétursson með Guðna Bergssyni formanni KSÍ og Guðrúnu Ingu Sívertsen varaformanni.
Guðmundur Pétursson með Guðna Bergssyni formanni KSÍ og Guðrúnu Ingu Sívertsen varaformanni. KSÍ

Guðmundur Pétursson, fyrrum varaformaður KSÍ, var sæmdur Heiðurskrossi KSÍ á ársþingi sambandsins á laugardaginn fyrir störf sín í þágu þess.  KSÍ segir frá þessu á heimasíðu sinni.

Guðmundur var aðalmarkvörður KR árin 1966 til 1969 og síðan aftur sumarið 1971. Hann varð Íslandsmeistari með KR-liðinu 1968. Hann lék einnig þrjá A-landsleiki árið 1967, gegn Danmörku og Spáni.

Þriðji og síðasti landsleikur hans var á Parken í Kaupmannahöfn 23. ágúst 1967 en hann fékk þá á sig fjórtán mörk í 14-2 tapi. Þetta er stærsta tap íslenska karlalandsliðsins frá upphafi. 

Guðmundur þjálfaði yngri flokka KR í mörg ár, meistaraflokk karla árið 1976 og hluta tímabils 1981. Guðmundur var jafnframt formaður rekstrarfélags KR þegar félagið varð Íslandsmeistari 1999 en það var fyrsti Íslandsmeistaratitill liðsins í 31 ár.

Guðmundur settist í stjórn KSÍ árið 1990 og var varaformaður sambandsins árin 1990 til 1995. Hann hefur verið þingforseti á ársþingi KSÍ árin 2006 til 2018. Guðmundur á sæti í áfrýjunardómstól KSÍ, hann var eftirlitsmaður á vegum UEFA og sat í áfrýjunarnefnd UEFA.

Guðmundur hefur verið nátengdur íslenskri knattspyrnu frá unga aldri og unnið gríðarlega gott starf í þágu knattspyrnuhreyfingarinnar á Íslandi, hvort sem það er á sviði félags- eða landsliða. KSÍ þakkaði honum fyrir frábær störf hans í gegnum tíðina á heimasíðu sinni.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira