Innlent

Ný fjársjóðsleit á hverju hausti

Jón Hákon Halldórsson skrifar
Tvenn ísgöng fundust í Breiðamerkurjökli í fyrra. Mennirnir tveir á myndinni eru staddir í öðrum þeirra og virka agnarsmáir í stórbrotinni náttúru. Fleiri myndir má sjá á nýjum vef Fréttablaðsins, frettabladid.is.
Tvenn ísgöng fundust í Breiðamerkurjökli í fyrra. Mennirnir tveir á myndinni eru staddir í öðrum þeirra og virka agnarsmáir í stórbrotinni náttúru. Fleiri myndir má sjá á nýjum vef Fréttablaðsins, frettabladid.is. Vísir/Haukur

Náttúra „Það er alveg ótrúlega gaman að leita og finna þessa hella. Þetta er eins og að fara í veiðiferðir eða fjársjóðsleit á hverju hausti þegar þarf að finna þá aftur eftir sumarið,“ segir Einar Rúnar Sigurðsson, ferðaþjónustufrömuður á Hofsnesi í Öræfum.

„Þeir hverfa margir yfir sumarið þegar jökullinn bráðnar kannski um 100 metra. Á sama tíma er áin kannski að bræða aðra útgáfu af hellinum inn úr jöklinum. Það er mjög spennandi að koma að hausti og sjá hvernig jöklarnir koma undan sumri,“ segir hann.

Einar og Haukur Snorrason ljósmyndari fóru saman í ferð í Breiðamerkurjökul fyrir helgi.

„Ég kalla þetta svæði fjársjóðseyjuna því þarna fann ég 2.000 ára gamlan viðarbút þegar ég fór fyrst í þessa hella,“ segir Einar. Þarna eru tveir stórir hellar sem Einar byrjaði að fara í á síðasta ári.

„Ég fór fyrst í þá í fyrra. Það er vatnskerfi sem kemur út úr hellunum og niður í lónið. Það hafa horfið 100 metrar af hellunum sem ég komst inn í í fyrra. Þetta eru svo miklar breytingar ár frá ári,“ segir hann.

Einar Rúnar hefur boðið upp á íshellaferðir fyrir ferðamenn í rúm 20 ár. „Ég er sá fyrsti til að bjóða þessar íshellaferðir hér á Suðausturlandi. Ég byrjaði árið 1996, en nú eru orðin eitthvað í kringum 20 fyrirtæki.“

Hann segir að sums staðar sé svo mikið af ferðamönnum að þeir séu næstum öxl við öxl. „Þetta er eiginlega eins og að vera við Seljalandsfoss að vera í þessum íshellum.“

Einar segir að það þurfi að ganga um þrjá kílómetra til að komast í fjársjóðshellana. „Í fyrra var ég sá eini sem fór þangað en í haust voru það fjórir til fimm hópar og núna eftir áramót eru þetta svona níu hópar. Þannig að á öðru ári er þessir hellar orðnir svolítið erfiðir að fara í með ljósmyndara,“ segir hann.

Einar segir þeim sem bjóða hellaferðir hafa fjölgað gríðarlega undanfarið. Nú séu það um 20 fyrirtæki.

„Ég er reyndar mjög hlynntur því að heimamenn hafi eitthvað að gera í þessu, en svo eru stór fyrirtæki úr Reykjavík með 20 til 30 brottfarir á dag,“ segir Einar. Að vísu sé þó ýmislegt sem bendi til þess að gullgrafaraæðið sé að taka enda.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.