Innlent

Viðar Guðjohnsen vill einnig í slaginn

Jakob Bjarnar skrifar
Viðar Guðjohnsen gefur kost á sér í leiðtogakjör Sjálfstæðismanna í borginni.
Viðar Guðjohnsen gefur kost á sér í leiðtogakjör Sjálfstæðismanna í borginni.

Viðar Guðjohnsen hefur tekið þá ákvörðun að gefa kost á sér í leiðtogakjör Sjálfstæðismanna vegna komandi sveitarstjórnarkosninga sem fram fram 27. janúar. Viðar bætist þá í kátan hóp sem fyrir er; Eyþór Arnalds, Áslaug Friðriksdóttir, Kjartan Magnússon og Vilhjálmur Bjarnason​. Þessi öll hafa gefið sig fram sem kandídatar í að leiða Sjálfstæðisflokkinn í Reykjavík.

Viðar, sem kallaður er Viðar Guðjohnsen eldri, innan flokksins, er ekki vel þekktur utan hans þó hann hafi látið til sín taka innan vébanda Sjálfstæðisflokksins, eins og sjá má að neðan.

Framboðsfrestur rennur út nú eftir hálftíma, klukkan 16:00, en oft hefur það gerst að menn hafa skilað inn framboði á síðustu stundu. Leiðtogakjörið fer fram þann 27. janúar.

Uppfært 16:25

Meðfylgjandi tilkynning barst frá Viðari eftir að þessi frétt birtist þar sem hann kynnir sig nánar til sögunnar og stefnumál sín, svohljóðandi:

Viðar Guðjohnsen, leigusali og athafnamaður, hefur ákveðið að gefa kost á sér í leiðtogakjöri Sjálfstæðisflokksins. Vill Viðar gefa flokksmönnum færi á að kjósa sterkan og stefnufastan leiðtoga með skýrar áherslur.

Telur Viðar að opinber gjöld, skattar og regluverk séu farin að hamla nýbyggingu íbúðarhúsnæðis. Mikilvægt er að taka til í þeirri óreiðu sem einkennir Reykjavíkurborg í dag. Fjármálin eru í ólestri á sama tíma og núverandi meirihluti eys fjármunum í gæluverkefni sem eru ekki til þess fallin að leysa þau miklu vandamál sem steðja að borginni.  Nauðsynlegt er að bjóða upp á valkost sem er tilbúinn að taka til í rekstrinum og skera niður í því óhófi sem hefur verið stundað síðustu ár. Of lengi hefur núverandi meirihluti ausið miklu fjármagni í yfirbyggingu, nefndir og gæluverkefni sem betur færu í grunnstoðir borgarinnar eða í hendur harðduglegra skattgreiðenda sem núverandi meirihluti vill reyna að mjólka um hverja krónu í gæluverkefni sín.

Samgöngumál höfuðborgarinnar eru í algjörum ólestri og skapa mikla og óþarfa mengun. Rándýr verkefni á borð við borgarlínu þarf að stöðva og leggja þarf þess í stað áherslu á betri vegi, umferð sem flæðir og skattalega hvata fyrir atvinnuuppbyggingu í efri byggðum. Skaði jafnaðarmanna á samgöngukerfinu er mikill og hugmyndafræði þeirra sem gengur út á að neyða fólk til þess að taka strætó hefur beðið algjört skipbrot. Reykjavík er höfuðborg landsmanna og flugvöllurinn í Reykjavík er flugvöllur allra landsmanna og tenging landsmanna við höfuðborgina. Flugvöllurinn á að vera þar sem hann er.

Viðar er fæddur 14. Janúar 1958 í Reykjavík. Foreldrar: Pétur Guðjohnsen, sjómaður og Gréta Guðjohnsen, húsmóðir. Eiginkona: Margrét Björg Júlíusdóttir, kennari (fædd 1955). Börn: Viðar Guðjohnsen, lyfjafræðingur (fæddur 1983), Júlíus Pétur Guðjohnsen, athafnamaður (fæddur 1986), Andri Valur Guðjohnsen, tölvunarfræðingur (fæddur 1989).

Á sínum yngri árum var Viðar Guðjohnsen afreksmaður í íþróttum, júdómeistari og í fyrsta hóp íslenskra ólympíufara í júdó 1976, þá aðeins átján ára að aldri. Viðar stofnaði með bróður sínum fyrstu líkamsræktarstöð sinnar tegundar á Íslandi í byrjun níunda áratug síðustu aldar, Orkubót, þá rétt um tvítugur. Þrítugur var hann orðinn umsvifamikill í byggingariðnaði og frumkvöðull í byggingu og leigu stúdíóíbúða sem á hug hans og hjarta enn þann dag í dag.

Umræður um stjórnmálaályktun - Viðar Guðjohnsen from Sjálfstæðisflokkurinn on Vimeo.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira