Aftur markalaust hjá Everton

Everton gerði sitt annað markalausa jafntefli í röð þegar liðið mætti West Bromwich Albion á útivelli í dag. Albion hefur ekki unnið síðustu átján deildarleiki sína.

Yannick Bolasie spilaði sinn fyrsta leik fyrir Everton í meira en ár, en hann kom til baka eftir krossbandsslit. Hann kveikti þó ekki í Everton-liðinu í dag, en leikurinn var einkar atkvæðalítill.

Gestirnir frá Liverpool áttu sitt fyrsta skot á markið í seinni hálfleik og þurftu að verjast áhlaupum West Brom án þess að ná að skapa sér neitt.

Everton er þó enn ósigrað síðan Sam Allardyce tók við liðinu.