Innlent

Guðríður sakar Ragnar Þór um dylgjur og lygar

Kolbeinn Tumi Daðason skrifar
Guðríður Arnardóttir segir nýkjörinn formann hafa borið á sig dylgjur og ósannindi.
Guðríður Arnardóttir segir nýkjörinn formann hafa borið á sig dylgjur og ósannindi.

Guðríður Arnardóttir, formaður félags framhaldsskólakennara sem beið lægri hlut í kosningu til formanns Kennarasambands Íslands, segir nýkjörinn formann hafa borið á sig dylgjur og ósannindi. Hún hafi ekki viljað tjá sig um málið enda yrði það túlkað sem viðbrögð við tapinu í kosningunni, að hún væri tapsár. Hún geti hins vegar ekki bitið í tunguna sína lengur.

Ragnar Þór Pétursson var kjörinn formaður KÍ þann 7. nóvember. Hann hlaut meirihluta atkvæða, 53%, en Guðríður 34%. 34 ára karlmaður frá Tálknafirði heldur því fram í viðtali við Vísi að Ragnar Þór hafi sýnt sér klám þegar hann var tólf ára. Ragnar Þór þvertekur fyrir að nokkuð slíkt hafi átt sér stað.

Þurfi að þola skítkast og óhróður
Guðríður segir að henni berist ábendingar frá lokuðum spjallvefjum kennara þar sem stuðningsmenn Ragnars Þórs saki hana um að vera á bak við það að Tálknfirðingurinn steig fram í viðtali til að gera Ragnari Þór erfitt um vik.

„Í aðdraganda þess að nýr formaður Kennarasambands Íslands var kosin mátti undirrituð þola frádæma skítkast og óhróður frá stuðningsmönnum nýkjörins verðandi formanns. Ég kaus að láta dylgjum og lygum ósvarað en vann þess í stað að framboði mínu á mínum forsendum, kynnti fyrir félagsmönnum sjálfa mig, áherslur mínar og talaði aldrei til mótframbjóðenda minna. Það hefði líklega ekki þótt smekklegt ef ég hefði farið að ræða gamla ásökun á hendur Ragnari um að misbjóða nemanda sínum enda hafði maðurinn farið mikinn í fjölmiðlum á sínum tíma að bera af sér sakir sem hann sagðist ekki hafa hugmynd um hverjar voru og taldi fullvíst að illa innrættur óvildarmaður bæri sökina.“

Guðríður segist vissulega hafa tekið tapinu illa, í einn dag. Svo haldi lífið áfram.

„Nú aftur á móti berast mér upplýsingar um að á lokuðum spjallvefjum kennara séu þessir sömu aðilar enn við sama heygarðshornið. En núna á það að vera undan mínum rifjum runnið að ungur maður sakar verðandi formann KÍ um misnotkun. Ungur maður sem ég þekki ekki neitt, steig fram og sagði sögu sína. Og nú er því haldið fram af þessum sömu aðilum að slíkt hafi verið gert í þeim tilgangi að hafa áhrif á kosningu varaformanns sem stendur nú yfir en þessir sömu aðilar halda uppteknum hætti og ætla að koma Ásthildi Lóu Þórsdóttur stuðningsmanns og bandamanns Ragnars í sæti varaformanns við hlið hans.“

Ásthildur Lóa er ein sex sem bjóða fram krafta sína til varaformennsku hjá KÍ.

Ragnar Þór Marinósson sem sakar nafna sinn Pétursson um blygðunarsemisbrot, með foreldrum sínum og systrum. Vísir/Anton Brink

Ekki hægt að sitja undir ruglinu
„Ég er nú búin að bíta í tunguna á mér undanfarna daga vitandi það að allt sem ég segi verður lesið í ljósi þess að ég tapaði fyrir Ragnari Þór. En það er ekki hægt að sitja undir þessu rugli lengur. Ragnar Þór og hans helstu stuðningsmenn reyna að klína þessu ömurlega máli á mig og stjórn KÍ.“

Í kjölfar þess að Tálknfirðingurinn steig fram ritaði Ragnar Þór pistil á vefsvæði sitt á Stundinni þann 4. desember. Þar sagði Ragnar Þór allt hafa verið uppi á borðinu varðandi ásakanirnar þegar hann hóf framboð sitt. Sömuleiðis að stjórn Kennarasambands Íslands hefði vitað allt um málið.

Guðríður vill meina að þar fari Ragnar ekki með rétt mál. Ragnar Þór hafi gripið til skrifa um miðjan október eftir að fyrrverandi forstöðumaður félagsmiðstöðvar Norðlingaskóla tjáði sig um sitt hlutverk þegar ásakanirnar komu upp árið 2013. 

„Þar kom í fyrsta sinn fram að á sínum tíma var ekki um nafnlausa ábendingu að ræða heldur kæru til lögreglu.“ Þannig sé ekki rétt að Ragnar fullyrði að hann hafi sett allt upp á borð í upphafi. Hann hafi aldrei greint frá því að málið hefði ratað á borð lögreglu.

Aldrei á borði KÍ
Þá segir hún Ragnar Þór aldrei hafa tilkynnt stjórn KÍ um málið þegar það kom upp á sínum tíma, árið 2013. 

„Hvorki til formanns KÍ eða stjórnar. Ekkert var fjallað um þetta mál á stjórnarfundum KÍ – það er ekki flóknara en fletta upp fundargerðum til að sjá það.“

Þannig að þegar Ragnar fullyrði að málið hafi legið á borðinu í þeirri mynd sem það er í dag sé það ósatt.

„Ragnar talar um að hann hafi verið „hrottalega heiðarlegur“, já það er líklega satt því kannski er óheiðarleikinn einmitt hrottalegur heiðarleiki. Ragnar Þór hikaði alla vega ekki við að bera á mig dylgjur og ósannindi.“


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira