Óvissa með þátttöku Kanes í stórleiknum um helgina

Óvíst er hvort Harry Kane verði með Tottenham í stórleiknum gegn Manchester United í hádeginu á laugardaginn. Hann glímir við meiðsli aftan í læri.

Kane fór meiddur af velli í 4-1 sigri Tottenham á Liverpool á sunnudaginn og lék ekki með liðinu í 2-3 tapi fyrir West Ham í enska deildabikarnum í gær.

„Við sjáum til. Við þurfum að taka stöðuna á hópnum. Við þurftum að gera breytingar í kvöld af öðrum ástæðum,“ sagði Mauricio Pochettino, knattspyrnustjóri Tottenham, eftir leikinn í gær.

Kane hefur verið sjóðheitur undanfarnar vikur og skorað grimmt. Hann er markahæstur í ensku úrvalsdeildinni ásamt Romelu Lukaku en þeir hafa báðir skorað átta mörk.

United og Tottenham eru jöfn að stigum í 2.-3. sæti deildarinnar.