Pogba frá í 4-6 vikur

Paul Pogba verður frá í allt að sex vikur vegna meiðslanna sem hann varð fyrir í leik Manchester United og Basel í Meistaradeild Evrópu í gær.

Pogba meiddist aftan í læri og þurfti að fara af velli snemma leiks. Frakkinn verður frá keppni í 4-6 vikur.

Pogba missir því af deildarleikjum gegn Everton, Southampton og Crystal Palace, deildabikarleik á móti Burton Albion og Meistaradeildarleik gegn CSKA Moskva.

Hann missir einnig af leikjum Frakka við Búlgara og Hvít-Rússa í undankeppni HM í byrjun næsta mánaðar.

Pogba hefur byrjað alla leiki United á tímabilinu og skorað tvö mörk.