Robert Downey kærður fyrir kynferðisbrot á ný

Anna Katrín Snorradóttir lagði fram kæru hjá lögreglu í gær gegn Robert Downey fyrir samskonar brot og hann var sakfelldur fyrir árið 2008. Hún segir að samskipti hennar og Roberts hafi staðið yfir í um þrjú ár, frá 2001 til 2004. Hún segir það senda röng skilaboð að veita dæmdum kynferðisbrotamanni uppreist æru og lögmannsréttindi á ný. Rætt var við Önnu Katrínu í kvöldfréttum RÚV í kvöld.

„Mig langaði alltaf til að koma fram, mig langaði alltaf til að skila skömminni en ég skammaðist mín ennþá of mikið og ég fékk mig ekki í það,“ segir Anna Katrín.

„Ég hafði í rauninni ekkert bakland og þessi tími er allur í móðu, í rauninni öll þessi ár og tíminn á eftir er bara í móðu.. Ég varð ofboðslega dofin, þunglynd, kvíðin og mig langaði ekki til að lifa því skömmin var svo mikil.“

Robert Downey, sem áður hét Róbert Árni Hreiðarsson, hlaut lögmannsréttindi á ný þann 15. júní síðastliðinn. Robert hafði áður verið dæmdur í Hæstarétti í þriggja ára fangelsi árið 2008 fyrir kynferðisbrot gegn fjórum unglingsstúlkum og hafði héraðsdómur áður einnig fallist á beiðni hans um að hann fengi lögmannsréttindin aftur.

Steig fram í kjölfar kvíðakasts

Anna Katrín segir að fréttir af niðurstöðu Hæstaréttar um að veita Robert lögmannsréttindi á ný hafi haft mikil áhrif á sig.

„Ég fæ svakalegt kvíðakast, eitt stærsta kvíðakast sem ég hef fengið og það endar með því að ég hringi á sjúkrabíl, ég hélt ég væri að deyja. Vanlíðanin er svo mikil að ég er ekki að höndla neitt. Það er síðan upp frá því þá ákvað ég að koma fram.”

Í dómi Héraðsdóms Reykjavíkur frá 2007 kemur fram að Róbert hafi nýtt sér yfirburði sína til að tæla fjórar stúlkur, þrjár 15 ára og eina 14 ára gamla, með peningagreiðslum og blekkingum.

Komst hann í samband við þær með blekkingum, og þóttist hann til að mynda vera 17 ára gamall táningspiltur að nafni Rikki í samskiptum við eina þeirra í gegnum netið.

Þá hafi hann í 15 skipti tælt aðra stúlku, sem þá var 15 ára með peningagreiðslum og blekkingum til þess að hafa við sig kynferðismök í bifreið á ýmsum stöðum í Reykjavík.