Innlent

Sakar forseta Golfsambandsins um gerræðisleg vinnubrögð

Jakob Bjarnar skrifar
Margeir er stóryrtur og gefur ekkert eftir. Golfhreyfingin öll er farin að nötra vegna grjótharðrar gagnrýni hans.
Margeir er stóryrtur og gefur ekkert eftir. Golfhreyfingin öll er farin að nötra vegna grjótharðrar gagnrýni hans.

Margeir Vilhjálmsson, sem meðal annars er stjórnarmaður í GR (Golfklúbbi Reykjavíkur), vandar forseta Golfsambands Íslands, Hauki Erni Birgissyni, ekki kveðjurnar. Margeir er afar ósáttur við þá ákvörðun að Íslandsmótið í holukeppni skuli aðeins leikið á 13 holum, en ekki 18. Óhætt er að segja að golfhreyfingin nötri vegna málsins. Vísir ræddi við Margeir og víst er að á málinu eru ýmsir athyglisverðir fletir.

Margeir hefur látið í sér heyra að undanförnu og hraustlega. Og víst er að þeim í Golfsambandinu svíður undan orðum hans en Margeir hefur verið stóryrtur og kallað Hauk Örn apaheila og líkt honum við Kim Jong Un. Er það ekki fullmikið af því góða, sérstaklega ef litið er til þess að þú ert ekki einhver Jói útí bæ, virkur á athugasemdakerfinu heldur stjórnarmaður í stærsta golffélagi Íslands?

„Það má vel vera,“ segir Margeir en hann bendir á að þetta sé sér hjartans mál. „Mín skoðun er sú að þetta sé miklu meira stórmál en menn geri sér grein fyrir.“

Menn þora ekki að tjá sig
Margeir segist málflutning sinn njóta stuðnings víða en það sé í þessu sem svo mörgu öðru að óttinn ræður ríkjum. Menn þora ekki að tjá sig.

„Fáir þora að tjá sig opinberlega um mál þarna af hættu við að lenda í einhverri ónáð. Afrekskylfingar gera það ekki, það gæti kostað þá styrki. Á undanförnum árum hafa golfklúbbarnir fært meiri og meiri völd til GSÍ hvað varðar mótahald. Það hefur ákveðna kosti en einnig töluverða galla.“

Margeir segir að þegar þetta mál sé skoðað virðist hin umdeilda ákvörðun vera tveggja manna, forsetans og Edwins Rögnvaldssonar. „Sem vill koma á framfæri hugmyndinni „why18holes“ og vinna henni fylgi. Sem er í sjálfu sér bara ágætis hugmynd. En, ekki á mótum. Svo er það spurningin af hverju Ísland þurfi að taka forystu í þessu máli?“

Hagsmunir og pólitík undirliggjandi
Það er síst ofsagt að forsetinn sýni gerræðisleg vinnubrögð í þessu máli, að mati Margeirs.

„Til dæmis hef ég rætt við mann í mótanefnd GSÍ sem las fyrst um þetta mál á golf.is. Ef GSÍ er með mótanefnd og mótsstjóra í fullri vinnu, og framkvæmdastjóra, af hverju er það forsetinn sem stendur í brúnni á þessu máli?“


Málið er heitt og Haukur Örn Birgisson var í viðtali í útvarpsþættinum Bítið í morgun.

Margeir segir svo frá að eftir að golfiðkun tók að hnigna, sérstaklega í USA, þá hafa menn farið að tala fyrir allskonar breytingum. „Að golf taki of langan tíma og leikhraði sé hægur og bla bla bla. Enginn hefur þó talað fyrir því að stytta keppnishringinn úr 18 holum, þetta á allt við daglegan leik. Þar til Jack Nicklaus fór að tala fyrir því að stytta hringinn í 12 holur.“

En, Margeir segir að þar liggi fiskur undir steini. „Jack Nicklaus rekur eða rak eitt stærsta golfvallahönnunarfyrirtæki í heimi. Þar var verkefnaskortur og þá var náttúrlega kjörið að stytta hringina og skapa sér þannig verkefni. Það var alveg vonlaust að stytta bara í 9 holur því það þurfti enga vinnu við það. Svo það er í þessu bullandi pólitík.“

Menn renna hýru auga til landrýmisins
Að sögn Margeirs eru 34.000 golfvellir í heiminum. Allir eru þeir byggðir upp miðað við 9/18 holu fyrirkomulag.

„Ef við byrjum á því að taka burtu rammann 18 holur í keppni hvað gerist þá í framhaldinu? Verður það bara háð duttlungum mótanefndar GSÍ hversu margar holur verða leiknar hverju sinni? Hvað þýðir það svo aftur fyrir mannvirkin (golfvellina sem hér standa)? Ég var framkvæmdastjóri GR, þegar fulltrúar Reykjavíkurborgar stóðu og horfðu yfir svæðið og veltu því fyrir sér hvort þarna væri ekki kjörland til byggingaframkvæmda. Og menn mega ekki vera svo barnalegir, sérstaklega ekki þegar þeir gegna hlutverki forseta Golfsambandsins að halda að allir séu hrifnir af landnotkun undir golfvelli. Því það er ekki svo.“

Margeir segir Jack Nicklaus eiga ríkra hagsmuna að gæta sem rími vel við tal um 12 eða 13 holu golfkeppni.

Margeir segir að Golfklúbbur Reykjavíkur hafi til umráða ríflega 150 hektara af landi innan borgarinnar, sem þeim þar finnst frábært en öðrum kannski fáránlegt.

„Og þegar að Golfsambandið ætlar að stytta keppnishringinn hvað þýðir það þá fyrir golfklúbba sem liggja á verðmætum landsvæðum innan borgarmarkanna; Keilir, GKG, GR, Nesklúbburinn...“

Dylgjur rökþrota manna
Samkvæmt heimildum Vísis vilja einhverjir rekja það hversu mjög Margeir lætur Hauk Örn Birgisson forseta fá það óþvegið til þess að þeir tveir tókust á árið 2013 þegar þeir buðu sig báðir fram til forseta hjá GSÍ. Haukur Örn hafði þá betur og með yfirburðum. Margeir gefur lítið fyrir slíkar raddir.

Það er auðvitað góð leið fyrir menn sem eru rökþrota að tengja málflutninginn við forsetaframboðið.
„Menn ættu kannski líka að rifja upp hvernig málum var háttað í kringum það framboð. Það væri nær lagi. Ég er langt því frá að vera sár eða tapsár. Framboðið sýndi fram á allt sem þurfti að sýna. Hvað gerði GSÍ í framhaldinu? Það hefur aldrei verið fjallað um það. Þeir breyttu lögum þannig að ekki er lengur hægt að gera það sem ég gerði þá, að bjóða mig fram á þinginu!“

Algerlega fáránlegt fyrirkomulag
Og Margeir heldur áfram að benda á brotalamir innan GSÍ: „Þar var talað fjálglega um að nú ætti að hætta að vera Við (GSÍ) og Þeir (klúbbarnir). Ég held að gjáin hafi aldrei verið stærri þarna á milli. Á þessu góða þingi 2013, gaf GSÍ út mikla skýrslu um framtíðarsýn í golfi til ársins 2020. Það væri vel við hæfi að lesa skýrsluna í dag og sjá hvernig gengur. Okkur hefur jú tekist að ná leikmönnum inná mótaraðir þeirra bestu, þeim Valdísi og Ólafíu, en annað gengur hægar eða er gleymt.“

Margeir segir að það megi vel vera að hann sé orðinn steingervingur í golfmálum. „En það þarf að vera ákveðin reglufesta. Og svo þarf í stórum málum að hafa víða sátt um hvernig þau eru unnin. Mér finnst það til dæmis vera Golfþings að ákveða hvort að Ísland eigi að taka forystu á heimsvísu í því að stytta golfhringinn í 13 holur eða hvað það eigi að vera, sérstaklega þegar heilt Íslandsmót er lagt undir og nota það svo sem rök að völlurinn sé ekki í lagi og það skipti ekki máli að stytta hringinn því holukeppni sé oft lokið bara á 13 holu. Þetta er algerlega fáránlegt.“


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira