Kanínurnar komnar í sumarfrí

Íslendingaliðið Svendborg Rabbits er komið í sumarfrí eftir tap fyrir Bakken Bears, 93-85, í undanúrslitum um danska meistaratitilinn í körfubolta. Bakken vann einvígið 3-0.

Arnar Guðjónsson er þjálfari Svendborg sem sló Team FOG Næstved úr leik í 8-liða úrslitunum.

Axel Kárason lék sinn síðasta leik fyrir Svendborg í kvöld en hann ætlar að leika með Tindastóli á næsta tímabili.

Axel var að venju í byrjunarliði Svendborg. Skagfirðingurinn skoraði níu stig, tók sjö fráköst og gaf þrjár stoðsendingar í kveðjuleiknum.

Stefan Bonneau, sem kom til Svendborg frá Njarðvík undir lok síðasta árs, var stigahæstur á vellinum með 28 stig.