Sport

Vinir Conors rústuðu hótelherbergi í Liverpool

Henry Birgir Gunnarsson skrifar
Gleraugu Conors vöktu athygli á veðeiðunum, rétt eins og klæðnaðurinn.
Gleraugu Conors vöktu athygli á veðeiðunum, rétt eins og klæðnaðurinn. vísir/getty

Conor McGregor fór á mikið skrall í Liverpool yfir páskana og vinir hans tóku ekkert aukalega fyrir að rústa hótelherberginu hans.

Conor vakti mikla athygli alla síðustu viku því hann byrjaði á því að mæta á veðreiðar klæddur eins og melludólgur. Þannig útskýrðu erlendir fjölmiðlar útganginn á honum.

Írinn skrautlegi mætti svo í hin og þessi partí í Liverpool og skemmti sér með bolnum. Sú veisla endaði með því að Conor ku hafa fengið sér lúr í trjáhúsi.

Er partíið tók enda bárust fréttir af því að hótelherbergi Conors hefði verið afar illa farið eftir vikuna. Það mun víst kosta milljónir að laga skemmdirnar á herberginu sem vinir hans eru sagðir vera ábyrgir fyrir.

Það var drasl um allt herbergið og meira að segja nokkrir kútar af gasi svo menn gætu verið með Andrésar andar eftirhermur.

Það var meira og minna allt ónýtt í herberginu og Conor er sagður hafa fengið hreinsunarteymi á herbergið áður en hann skilaði því. Svo slæmt var ástandið. Það fólk gat þó ekki lagað allt sem hafði verið brotið og bramlað og feitur reikningur bíður því Írans.

Conor í banastuði á veðreiðunum. vísir/getty


Fleiri fréttir

Sjá meira