Innlent

Rannsaka hvort neyða átti mennina til kynlífs

Snærós Sindradóttir skrifar
Mennirnir komu til landsins með flugi um síðustu helgi. Heimildir Fréttablaðsins herma að þeir séu vegabréfslausir.
Mennirnir komu til landsins með flugi um síðustu helgi. Heimildir Fréttablaðsins herma að þeir séu vegabréfslausir. vísir/andri marinó
Mennirnir tveir frá Rúmeníu, sem lögreglan er nú að rannsaka hvort séu fórnarlamb mansals, gáfu sig fram við Rauða krossinn strax við komuna til landsins. Þeir bera því við að hafa orðið fyrir ofbeldi í öðru landi þar sem þeir voru gerðir út.

Framburður mannanna gefur tilefni til að lögregla rannsaki hvort ekki einungis sé um vinnumansalsmál að ræða, heldur einnig kynlífsmansal.

Mennirnir komu til landsins um síðustu helgi frá ótilgreindu landi innan Schengen-svæðisins og leituðu á náðir Rauða krossins. Þeir eru báðir á þrítugsaldri. Samkvæmt upplýsingum frá lögreglu hefur enginn verið handtekinn vegna málsins enn sem komið er en lögregla segir að verið sé að reyna að sannreyna sögu mannanna. Mennirnir hafi ekki getað bent á það hver átti að taka á móti þeim hér á landi.

„Í grunninn er grunur um mansal en hvort það er nauðungarvinna eða kynlífsmansal er ekki hægt að staðfesta núna,“ segir Snorri Birgisson, sem fer fyrir mansalsteymi lögreglunnar á höfuðborgarsvæðinu.

Heimildir Fréttablaðsins herma að sá sem átti að sækja mennina við komuna til landsins hafi látið sjá sig en mennirnir segja að þeir hafi látið sig hverfa annað áður en til kynna við viðkomandi kom.

„Þetta mál er bara alveg á frumstigi. Hverjir, hvar, hvenær og svo framvegis. Við erum að meta frásögn einstaklinganna.“

Undanfarin ár hefur lögreglan haft í nógu að snúast við að rannsaka vinnumansal en minna hefur borið á rannsóknum vegna kynlífsmansals.  Fréttablaðið greindi ítarlega frá rannsókn á vinnumansalsmáli innan Félags heyrnarlausra á síðasta ári og mansals hjá undirfyrirtæki IceWear í Vík í Mýrdal.

Samkvæmt áætlun síðustu ríkisstjórnar gegn mansali á Íslandi er mansal sagt vera hagnýting á einstaklingum í kynferðislegum tilgangi, vinnuþrælkun eða refsiverð hagnýting á líkama einstaklings til dæmis með fíkniefnasmygli eða líffærasölu. Einstaklingar eða hópar einstaklinga séu notaðir í ábataskyni með einum eða öðrum hætti. 


Tengdar fréttir

Rannsaka grun um mansal

Lögreglan á höfuðborgarsvæðinu rannsakar nú mál tveggja karlmanna frá Rúmeníu en grunur leikur á að þeir séu fórnarlömb vinnumansals. Rúmenarnir höfðu samband við Rauða kross Íslands um helgina og óskuðu eftir aðstoð.




Fleiri fréttir

Sjá meira


×