Innlent

Nefnd Evrópuráðsins segir boðskap Útvarps Sögu og Omega hatur

Þórgnýr Einar Albertsson skrifar
Arnþrúður Karlsdóttir, útvarpsstjóri Útvarps Sögu. Stöð hennar er sögð miðla hatursorðræðu í nýrri skýrslu.
Arnþrúður Karlsdóttir, útvarpsstjóri Útvarps Sögu. Stöð hennar er sögð miðla hatursorðræðu í nýrri skýrslu.

Nefnd Evrópuráðsins gegn kynþáttafordómum og umburðarleysi (ECRI) hefur áhyggjur af efni sjónvarpsstöðvarinnar Omega og útvarpsstöðvarinnar Útvarps Sögu. Þetta kemur fram í fimmtu skýrslu nefndarinnar um Ísland.

„ECRI tekur eftir því að einkarekna sjónvarpsstöðin Omega, sem nefnd er í fjórðu skýrslunni, heldur áfram að gefa sig að hatursorðræðu gegn múslimum,“ segir í skýrslunni. Þá segir einnig að ECRI sé kunnugt um Útvarp Sögu sem dreifi hatursorðræðu sem beint sé að innflytjendum, múslimum og hinsegin fólki.

Sveinbjörg Birna Sveinbjörnsdóttir, borgarfulltrúi Framsóknar og flugvallarvina. Framboð hennar var sagt hafa gert andstöðu við múslima að sínu helsta baráttumáli. Vísir/Valli

Nefndin hefur einnig áhyggjur af orðræðu Íslendinga á netinu. Þá segir að internetið hafi verið notað til þess að tjá fjandsamlegt viðhorf til hinsegin fólks. „Má nefna sem dæmi viðbrögð við fréttatilkynningu Hafnarfjarðarbæjar í apríl 2015 um þá ákvörðun að hefja „hinsegin fræðslu“ í skólum bæjarins.“ 

ECRI segir enn fremur að sveitarstjórnarkosningarnar í júní 2014 hafi einkennst af æstri orðræðu gegn múslimum. Gagnrýnir nefndin þar lista Framsóknar og flugvallarvina sérstaklega. „Framsóknarflokkurinn gerði andstöðu við moskuna og múslima almennt að sínu helsta baráttumáli og fulltrúi flokksins í borgarstjóraembætti Reykjavíkur tilkynnti að hún myndi afturkalla ákvörðunina um að úthluta landi undir byggingu moskunnar,“ segir í skýrslunni.

Ummæli Ásmundar Friðrikssonar eru sögð umburðarlaus og fordómafull. Vísir/Vilhelm

Nefndin gagnrýnir Ásmund Friðriksson, þingmann Sjálfstæðisflokksins. „Í janúar 2015 spurði þingmaður Sjálfstæðisflokksins á Facebook-síðu sinni hvort Íslendingar væru óhultir fyrir hryðjuverkum og vildi láta gera bakgrunnsrannsókn á þeim 1.500 múslimum sem búa á Íslandi til þess að komast að því hvort þeir hefðu sótt æfingabúðir hryðjuverkamanna.“ Eru þessi ummæli kölluð umburðarlaus og fordómafull. 

Fréttin birtist fyrst í Fréttablaðinu



Fleiri fréttir

Sjá meira