Innlent

Fjórir lögreglumenn sinna tuttugu þúsund manna samfélagi

Stefán Ó. Jónsson skrifar
Lögreglumenn í Eyjafirði, þar með talið Akureyri, hafa miklar áhyggjur af stöðu mála.
Lögreglumenn í Eyjafirði, þar með talið Akureyri, hafa miklar áhyggjur af stöðu mála. Vísir/Pjetur

Aðalfundur Lögreglufélags Eyjafjarðar samþykkti á dögunum ályktun þar sem lýst er yfir miklum áhyggjum af þeim skorti á lögreglumönnum, „sem hefur verið viðvarandi í Eyjafirði síðustu ár.“

Félagið sendi frá sér ályktun þar sem greint er frá því að skorið hafi verið niður í mannafla hjá embætti Sýslumannsins á Akureyri á hrunárunum 2008 til 2011. Segir félagið að framlög til embættisins síðan þá hafi ekki skapað neina möguleika á að ráða menn að nýju. Staðan sé því sú í dag að 4 lögreglumenn eru að jafnaði á útkallsvakt á Akureyri og sinna 20.000 manna samfélagi.

„Félagið telur að þessi fámenni fjöldi lögreglumanna standist engan samanburð við það sem gengur og gerist annars staðar á landinu. Í sumar verða almennt áfram aðeins 4 lögreglumenn á hverri vakt og því ljóst að vegna sumarleyfa mun sú staða koma upp að tveir fagmenntaðir lögreglumenn verða á vaktinni og tveir afleysingamenn, ómenntaðir. Þetta er algerlega óásættanleg staða. Hún er óásættanleg fyrir þá sem þurfa á þjónustu lögreglunnar að halda og hún er óásættanleg fyrir lögreglumennina út frá öryggissjónarmiðum og álagi,“ segir í ályktun félagsins.

Félagið segir sömuleiðis að í ljósi lélegrar nýliðunar hafi meðalaldur lögreglumanna í Eyjafirði farið hækkandi og sé nú kominn í rúm 48 ár. Á sama tíma fjölgi stöðugt verkefnum lögreglunnar á öllum sviðum en ekki hvað síst með gífurlegri fjölgun ferðamanna.

„Í ljósi þessa lýsir Lögreglufélag Eyjafjarðar yfir áhyggjum af öryggi og velferð félagsmanna sinna og skorar á ráðamenn að taka nú þegar undir mjög hófstilltar tillögur Lögreglustjórans á Norðurlandi eystra um fjölgun lögreglumanna við embættið sem kynntar voru á síðasta ári,“ eins og það er orðað.

Lögreglustjórinn á Norðurlandi eystra, Halla Bergþóra Björnsdóttir, sendi í fyrra erindi til yfirvalda þess efnis að bæta þyrfti að lágmarki við 5 lögreglumönnum á svæðinu. Telur félagið það vera lágmarksviðbót.



Fleiri fréttir

Sjá meira