Innlent

Líklegt að helstu leiðum verði lokað á morgun vegna veðurs

Birgir Olgeirsson skrifar
Búast má við lokunum á Hellisheiði, Þrengslum, Mosfellsheiði og Vesturlandsvegi um Kjalarnes.
Búast má við lokunum á Hellisheiði, Þrengslum, Mosfellsheiði og Vesturlandsvegi um Kjalarnes. Vísir/TLT

Vegna óveðurs má búast við að á morgun, fimmtudag, þurfi að grípa til lokana á vegum á Suðvesturlandi. Þetta kemur fram í tilkynningu frá Vegagerðinni en þar segir að líkur séu á því að um og upp úr hádegi verði vegum lokað yfir Hellisheiði, um Þrengsli og á Mosfellsheiði.

Ólíklegt er að unnt verði að beina umferð um Suðurstrandarveg á meðan lokanir vara. Þá er líklegt að einnig þurfi að loka Vesturlandsvegi um Kjalarnes.

Samkvæmt ábendingu frá Veðurfræðingi, sem finna má inni á vef Vegagerðarinnar, mun lægð sem dýpkar ört suður af landinu valda ofanhríð og stormi eftir hádegi á morgun. Fyrst á Hellisheiði frá því um og upp úr hádegi og um miðjan dag almennt um sunnanvert landið. Austan 18-25 m/s og reiknað með snörpum byljum s.s. undir Eyjafjöllum, í Öræfum og á Kjalarnesi. 

Hætt er við að mjög blint verði.  Síðdegis blotar á láglendi og þá tekur við flughálka á vegum. Skil lægðarinnar er síðan spáð norður yfir landið annað kvöld.  


Tengdar fréttir

Viðvörun vegna óveðurs

Spáð er austan og norðaustan stormi eða roki, 20-28 m/s sunnan- og vestantil á landinu síðdegis á morgun, en norðan- og austantil aðra nótt.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira