Fótbolti

Alfreð farinn frá Olympiakos | Hafnaði tilboði úr MLS-deildinni

Kristinn Páll Teitsson skrifar
Alfreð sækir hér að Alexis Sanchez, stórstjörnu Arsenal, fyrr í vetur.
Alfreð sækir hér að Alexis Sanchez, stórstjörnu Arsenal, fyrr í vetur. Vísir/Getty

Gríska stórveldið Olympiacos hefur óskað eftir því að lánssamningi Alfreðs Finnbogasonar sem hefur verið á mála hjá félaginu undanfarið hálfa árið verði rift en þetta kemur fram í spænska blaðinu AS.

Alfreð gekk til liðs við Olympiacos á lánssamning frá Real Sociedad síðasta sumar en tækifærin voru af skornum skammti í Grikklandi. Lék hann aðeins sjö leiki í grísku úrvalsdeildinni og skoraði í þeim eitt mark af vítapunktinum.

Alfreð tryggði liðinu eftirminnilegan sigur á Arsenal fyrr í vetur með því að skora sigurmarkið í 3-2 sigri á Emirates en þrátt fyrir það fékk hann fá tækifæri hjá liðinu.

Óvíst er hvort hann fái tækifæri hjá Real Sociedad sem er að berjast fyrir lífi sínu í spænsku deildinni en líklegt þykir að hann verði aftur sendur út í lán.

Segir AS frá því að Alfreð hafi hafnað tilboði frá liði í MLS-deildinni og að hann sé ákveðinn í að finna lið innan Evrópu til þess að vera í góðu standi fyrir EM í Frakklandi í sumar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira