Enski boltinn

Jóhann Berg lagði upp þrjú í mikilvægum sigri

Kristinn Páll Teitsson skrifar
Jóhann í leik með Charlton á dögunum.
Jóhann í leik með Charlton á dögunum. Vísir/getty

Jóhann Berg Guðmundsson átti stórleik í 4-1 sigri Charlton á Rotherham í ensku B-deildinni í dag en Jóhann lagði upp þrjú af fjórum mörkum Charlton.

Charlton mátti ekki við því að tapa fleiri stigum og fengu sannkallaða draumabyrjun þegar Simon Makienok skoraði á 4. mínútu leiksins.

Igor Vetokele bætti við öðru marki Charlton stuttu fyrir lok fyrri hálfleiks eftir góðan undirbúning Jóhanns.

Makienok var aftur á ferðinni á 69. mínútu eftir sendingu Jóhanns áður en Ademola Lookman gerði út um leikinn með fjórða marki Charlton eftir sendingu frá Jóhanni.

Charlton náði með sigrinum að saxa á Rotherham sem situr í 21. sæti en Charlton er enn í fallsæti að 29. umferðum loknum.

Landsliðsfyrirliðinn Aron Einar Gunnarsson þurfti að sætta sig við að byrja á bekknum í 3-2 sigri á Huddersfield á útivelli en Aron lék síðasta korter leiksins.

Cardiff heldur áfram að berjast um sæti í umspilinu en velska liðið er þremur stigum frá umspilssæti að 29. umferðum loknum.

Þá lék Eggert Jónsson allan leikinn í 1-2 tapi Fleetwood Town gegn Bradford á útivelli í kvöld en Eggert fékk gult spjald í leiknum.




Fleiri fréttir

Sjá meira