Enski boltinn

Klopp varar Guardiola við

Eiríkur Stefán Ásgeirsson skrifar
Vísir/Getty

Jürgen Klopp, stjóri Liverpool, segir að fjöldi leikja hjá enskum úrvalsdeildarliðum gæti komið Pep Guardiola á óvart.

Guardiola þjálfar í dag Bayern München en hann tilkynnti á dögunum að hann myndi fara frá félaginu í sumar og hefur hann verið orðaður við stórlið í ensku úrvalsdeildinni.

Klopp tók í haust við Liverpool og segir að gríðarlegur fjöldi leikja hafi komið sér á óvart. Hann hafi til dæmis ekki gert sér grein fyrir því að lið sem skilja jöfn í enska bikarnum þurfa að spila aftur.

Né heldur að lið sem eru í undanúrslitum ensku deildabikarkeppninnar þurfi að spila heima og að heiman.

„Pep er afar reyndur. Ég er viss um að hann muni kaupa nokkra leikmenn og verða með gott lið - 35 leikmenn eða svo.“

„Fjöldi leikja er stærsti munurinn. Fólk heima í Þýskalandi skilur mig ekki þegar ég segi því frá því hvernig fyrirkomulagið er í bikarnum. Það er framlenging og vítaspyrnukeppni - en bara eftir seinni leikinn.“

Mikill fjöldi leikmanna er nú frá vegna meiðsla hjá Liverpool sem má líklega skrifa á álag. Sjö leikmenn glíma við meiðsli aftan í læri en nú síðast meiddist Jordan Ibe í undanúrslitaleik Liverpool og Stoke í deildabikarnum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira