Innlent

Lýst yfir þungum áhyggjum af fjárhagslegri stöðu grunnskólanna

sunna karen sigurþórsdóttir skrifar
Félag skólastjórnenda í Reykjavík hefur verulegar áhyggjur af skertri þjónustu við nemendur.
Félag skólastjórnenda í Reykjavík hefur verulegar áhyggjur af skertri þjónustu við nemendur. vísir/vilhelm

Félag skólastjórnenda í Reykjavík lýsir yfir verulegum áhyggjum af fjárhagslegri stöðu grunnskólanna í borginni og skertri þjónustu við nemendur. Enn hafi ekki verið bætt úr niðurskurði sem gripið hafi verið til í kreppunni.

Í ályktun frá félaginu segir að gripið hafi verið til umtalsverðs niðurskurðar, bæði á almennum rekstri og stjórnun. Rekstur skólanna hafi því verið afar erfiður.

„Á síðustu árum hefur niðurskurður enn verið aukinn og í því sambandi má benda á beinan niðurskurð til sérkennslu á árinu 2015 auk niðurskurðar til annarra þátta. Sú ákvörðun borgaryfirvalda að skólar flytji nú með sér halla á rekstri ársins 2015 yfir á 2016 mun, um leið og boðaður er frekari niðurskurður, eingöngu leiða til skertrar þjónustu við nemendur í grunnskólum borgarinnar á komandi misserum,“ segir í ályktuninni.

Þá hafi fjármagn til grunnskólanna í borginni alls ekki fylgt þeirri verðlags- og launaþróun sem orðið hafi, né komið að fullu til móts við þær reglugerðar- og lagabreytingar sem hafi átt sér stað. Því megi segja að fjármagn til reksturs grunnskóla í Reykjavík sé alls ekki í takt við lögboðið hlutverk og skyldur hans.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira