Enski boltinn

Fyrirliðinn skaut Swansea upp úr fallsæti

Tómas Þór Þórðarson skrifar
Gylfi Þór Sigurðsson.
Gylfi Þór Sigurðsson. vísir/getty

Gylfi Þór Sigurðsson og félagar hans í Swansea eru komnir aftur á sigurbraut í ensku úrvalsdeildinni, en velska liðið vann 1-0 sigur á nýliðum Watford í kvöld.

Eina mark leiksins skoraði fyrirliðinn Ashley Williams með flottum skalla á 27. mínútu eftir undirbúning Suður-Kóreumannsins Ki Sung-Yong.

Bafétimbi Gomis var hársbreidd frá því að koma Swansea í 2-0 undir lok leiksins en skaut í stöngina og Troy Deeney var svo ekki langt frá því að jafna í uppbótartíma fyrir Watford.

Swansea var fyrir leikinn í kvöld búið að tapa tveimur deildarleikjum í röð og ekki unnið síðan á öðrum degi jóla.

Með sigrinum komst Swansea upp úr fallsæti, en það er nú með 22 stig, einu stigi meira en Newcastle sem er fallsæti eftir úrslitin í kvöld.

Eftir að skora í tveimur deildarleikjum í röð tók Gylfi Þór sér smá pásu frá markaskorun, en hann var mjög duglegur í kvöld og skilaði boltanum vel frá sér.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira