Sport

Verður einn kaldasti leikur í sögu NFL-deildarinnar

Henry Birgir Gunnarsson skrifar
Það mun heldur betur reyna á leikmenn í Minnesota á sunnudag.
Það mun heldur betur reyna á leikmenn í Minnesota á sunnudag. vísir/getty

Leikur Minnesota Vikings og Seattle Seahawks í úrslitakeppni NFL-deildarinnar á sunnudag verður ekki fyrir neinar kuldaskræfur.

Leikurinn fer fram utandyra og spáin er köld. Mjög köld. Spáin hljómar í dag upp á mínus 18 gráður er leikur hefst. Með vindkælingu mun kuldinn líklega verða í kringum mínus 28 gráður.

Verið er að byggja nýjan völl fyrir Vikings sem verður innandyra. Þeir eru að klára tveggja ára skeið utandyra á meðan beðið er eftir nýju höllinni.

Kaldasti leikur þeirra síðustu tvö ár fór fram í ellefu gráðu frosti. Þetta er eitthvað allt annað sem bíður á sunnudag.

Kaldasti leikurinn í sögu NFL fór fram 31. desember árið 1967 er Green Bay tók á móti Dallas. Sá leikur hefur alltaf verið kallaður „Ice Bowl“ enda var það úrslitaleikur deildarinnar. Hitastigið á þeim leik var mínus 25 gráður.

Kaldasti leikurinn í sögu Vikings fór fram 3. desember árið 1972 er Chicago kom í heimsókn. Þá var hitastigið mínus 18 gráður.

Allir leikirnir í úrslitakeppni NFL-deildarinnar verða í beinni útsendingu á Stöð 2 Sport. Úrslitakeppnin hefst um helgina en þá verða tveir leikir spilaðir á laugardag og aðrir tveir á sunnudag.

NFL


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira