Innlent

Vendingar í Vatnsendamálinu: Frávísunarkröfu Kópavogsbæjar hafnað og málinu skipt í tvo hluta

sunna karen sigurþórsdóttir skrifar
Erfingjarnir fara fram á sjötíu og fimm milljarða í skaðabætur.
Erfingjarnir fara fram á sjötíu og fimm milljarða í skaðabætur. vísir/valli

Máli erfingjanna á Vatnsenda gegn Kópavogsbæ verður skipt upp í tvo hluta. Það var tekið fyrir í Héraðsdómi Reykjaness í síðustu viku þar sem dómari skar úr um að í fyrstu verði fjallað um greiðsluskyldu bæjarins og í kjölfarið upphæð skaðabótakröfunnar. Þá var kröfu Kópavogsbæjar um frávísun hafnað.



Erfingjarnir eru tíu talsins, en þeir fara fram á sjötíu og fimm milljarða í skaðabætur frá Kópavogsbæ vegna eignarnáms í landi Vatnsenda á árunum 1992-2007.



„Það er visst hagræði í því að taka þetta í tveimur skrefum í stað þess að gera þetta í einu lagi, þannig að þetta er skynsamleg ákvörðun,“ segir Valgeir Kristinsson, lögmaður Markúsar Ívars Hjaltested, eins erfingja Sigurðar Hjaltested, fyrrum ábúanda að Vatnsenda.

Þorsteinn Hjaltested

Þorsteini greiddar bætur - ekki öðrum eigendum jarðarinnar

Málaferli þessi hófust eftir að Hæstiréttur komst í mars síðastliðnum að þeirri niðurstöðu að ráðstafa skyldi beinum eignarrétti til fimmtán erfingja Sigurðar Hjaltested, en ekki einungis til sonarsonar hans, Þorsteins Hjaltested. Hann fékk milljarða frá Kópavogsbæ í bætur, eftir að bærinn tók hluta jarðarinnar eignarnámi.



Málið á sér langan aðdraganda, en deilur um jörðina hafa nú staðið yfir í nærri fimmtíu ár. Miklir fjárhagslegir hagsmunir eru í húfi, ekki síst vegna þess að jörðin er eitt helsta byggingarland Kópavogsbæjar.



Upphaflegur eigandi jarðarinnar var Magnús Einarsson Hjaltested. Hann eignaðist jörðina árið 1914 en var ókvæntur og barnlaus. Það fór svo að barnabarn bróður hans, Sigurður Kristján Lárusson Hjaltested, erfði Vatnsendajörðina og hóf þar búskap árið 1958 með seinni konu sinni.

Sigurður lést árið 1966 en þá fór sonur hans frá fyrra hjónabandi, Magnús Hjaltested, fram á að fá jörðina. Sú krafa leiddi til málaferla sem enduðu með því að ekkja Sigurðar var borin út af heimilinu. Þegar Magnús lést svo árið 1999 tók Þorsteinn Hjaltested, elsti sonur hans, við jörðinni.



Málaferli þau sem nú hafa verið leidd til lykta hófust árið 2007 og hafa því staðið í 8 ár. Málinu er þó í raun ekki lokið þar sem skipta þarf búi Sigurðar Hjaltested frá árinu 1966 aftur.



Málið verður tekið fyrir í Héraðsdómi Reykjaness á föstudag og í kjölfarið tekið til efnislegrar meðferðar í janúar á næsta ári.

Deilur um Vatnsendaland Kópavogur

Tengdar fréttir

Áratuga löng barátta um Vatnsenda: Hvað tekur nú við?

Réttarstaða afkomenda Sigurðar Hjaltested heitins, eiganda Vatnsenda jarðarinnar í Kópavogsbæ, hefur skýrst verulega eftir niðurstöðu Hæstaréttar í gær. Þetta er álit lögmanns afkomenda Sigurðar sem vill engu spá um framhald málsins.

Vatnsendi aftur í dánarbúið - deilur til 44 ára halda áfram

Héraðsdómur Reykjavíkur komst að þeirri niðurstöðu í morgun að jörðin Vatnsendi í Kópavogi teldist til eigna dánarbús Sigurðar Kristjáns Lárussonar Hjaltested. Málið er vægast sagt umdeilt en það er Þorsteinn Hjaltested sem hefur jörðina til umráða í dag.

Deilan um Vatnsenda: "Þetta splundraði bara fjölskyldunni"

Yngsti sonur Sigurðar Hjaltested, sem var eigandi Vatnsenda á sjöunda áratugnum, segir niðurstöðu Hæstaréttar í gær mikinn sigur en í raun bara upphafið að endinum. Hann segist finna til léttis að viðurkennt hafi verið að Vatnsendi sé enn í eigu dánarbús föður síns. Það hafi tekið verulega á þegar hann og fjölskylda hans voru borin út af heimili sínu fyrir tæpum 45 árum.

Áfram deilt um Vatnsenda í Kópavogi

Þorsteinn Hjaltested hefur kært niðurstöðu Sýslumannsins í Reykjavík um að ógilda ekki þinglýsingu á afsali fyrir landinu Vatnsendakriki, sem Kópavogur afsalaði sér til Reykjavíkur.

Vatnsendi ekki í eigu Þorsteins - 45 ára gömlum deilum lokið

Hæstiréttur staðfesti í dag dóm Héraðsdóms Reykjavíkur að jörðin Vatnsendi í Kópavogi teljist til eigna dánarbús Sigurðar Kristjáns Lárussonar Hjaltested sem lést árið 1966, en ekki Þorsteins Hjaltested, móður hans og systkina, sem hafa verið réttmætir eigendur jarðarinnar síðustu ár.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið