Innlent

Heiðari Má og Má Guðmundssyni lenti saman

Þorbjörn Þórðarson skrifar
Heiðar Már Guðjónsson
Heiðar Már Guðjónsson Mynd/Stöð2

Seðlabankinn gæti bakað ríkinu skaðabótaskyldu ef hann hættir við söluna á Sjóvá á röngum forsendum. Framkvæmdastjóri Sölvhóls, rekstrarfélags Seðlabankans, er hlynntur sölunni og hefur mælt með henni en seðlabankastjóri hefur enn ekki skrifað undir.

Algjörlega óvíst er hvort hópur fjárfesta undir forystu Heiðars Más Guðjónssonar fái að kaupa hlut í tryggingafélaginu Sjóvá, en söluferlið hefur nú staðið yfir í níu mánuði. Haukur Camillus Benediktsson, hagfræðingur hjá Seðlabankanum, er framkvæmdastjóri Sölvhóls, sem sér um eignasafn Seðlabankans, sem fer með 73 prósenta hlut í Sjóvá fyrir hönd bankans. Samkvæmt heimildum fréttastofu hefur Haukur Camillus gefið samþykki sitt fyrir kaupunum og mælt með þeim, en enn er beðið eftir undirritun stjórnar Eignasafns Seðlabankans og þar með Más Guðmundssonar seðlabankastjóra. Haukur Camillus vildi ekki tjá sig um þetta í samtali við fréttastofu í dag.

Ef Seðlabankinn ákveður að hætta við án þess að styðjast við gildar réttarheimildir og viðhlítandi rök kann það að baka bankanum, og þar með íslenska ríkinu, skaðabótaskyldu, samkvæmt uppýsingum fréttastofu.

Einn heimildarmaður fréttastofu segir að söluferlið hafi verið með miklum ólíkindum. Inn í málið fléttist persónuleg samskipti Heiðars Más og Más Guðmundssonar, seðlabankastjóra, en þeim mun hafa lent harkalega saman fyrir nokkrum árum, áður en Már tók við embætti seðlabankastjóra. Heiðar Már hafði verið gagnrýninn á stefnu Seðlabankans í tíð Más Guðmundssonar er hinn síðarnefndi gegndi embætti aðalhagfræðings bankans. Ekki náðist í Heiðar Má í dag til að fá nánari upplýsingar um deilu þeirra tveggja.

Samkvæmt heimildum fréttastofu hafa nefndarmenn í skilanefnd Glitnis, Heimir Haraldsson og Árni Tómasson, tafið söluferlið og látið í ljós þá skoðun sína að verðið sé allt of lágt.

Heimildarmenn fréttastofu segja að Heimir Haraldsson hafi lagt stein í götu söluferlisins með ýmsum hætti. Heimir vildi þó ekki kannast við það í samtali við fréttastofu í dag, en sagði að skilanefnd Glitnis hefði talið verðið of lágt og af þeirri ástæðu hefði skilanefndin dregið sig út úr söluferlinu á fyrri stigum þess.









Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.