Kreppan kemur við kaunin hjá Magasin du Nord

18. desember 2008 12:38

Fjármálakreppan setur strik í reikningin hvað jólaverslunina í Danmörku varðar og á það einnig við um stórverslunina Magasin du Nord sem er í eigu Íslendinga. Það eru þó ekki Danir sjálfir sem spara við sig jólainnkaupin heldur aðrir Norðurlandabúar sem heimsækja Magasin, einkum Svíar.

Business.dk fjallar um málið og ræðir við Carsten Fensholt fjármálastjóra Magasin í Kaupmannahöfn. "Það skortir einfaldlega ferðamenn í Kaupmannahöfn í augnablikinu," segir Fensholt. "Það eru sérstaklega Svíar sem hafa ákveðið að vera heima hjá sér þessi jólin sökum þess hve sænska krónan er veik. En það er einnig áberandi hve fáir Norðmenn koma nú samanborið við áður fyrr.

Salan hjá Magasin frá í haust, að jólaversluninni meðtalinni, er 3-5% minni en á sama tíma í fyrra er sölumet var slegið.

Fensholt segir að þeir geti séð á greiðslukortakvittunum að það séu einkum ferðamenn sem sækja verslunina í minna mæli en áður.

Hann segir þó að jólaverslunin sé í viðunandi horfi þrátt fyrir allt talið um fjármálakreppuna.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.