Boston - Indiana

Viðureign Boston Celtics og Indiana Pacers verður forvitnilegt einvígi, en margir hallast að því að Indiana liðið gæti komið á óvart í úrslitakeppninni. Boston er með heimavallarréttinn í rimmunni og hefur á að skipa mjög skemmtilegu sóknarliði með fjölmörg vopn þeim megin vallarins. Lykilmenn liðsins eins og Gary Payton, Paul Pierce, Ricky Davis að ógleymdum Antoine Walker, geta gert hvaða liði sem er skráveifu ef þeir detta í stuð. Endurkoma Walkers í liðið varð öllum að óvörum til þess að bæta leik liðsins og það var hann að öðrum ólöstuðum sem tryggði liðinu efsta sætið í Atlantshafsriðlinum í fyrsta skipti í háa herrans tíð. Varnarleikurinn er þó Akkílesarhæll liðsins og saga úrslitakeppninnar er ekki á bandi veikra varnarliða, svo að Indiana gæti allt eins komið á óvart og stolið sigrinum í þessu einvígi. Lið Indiana varð fyrir áfalli þegar ólátabelgurinn Ron Artest var settur í bann út tímabilið, en nú bíða leikmenn liðsins eftir að heilladísirnar snúist þeim á band. Reggie Miller er leiðtogi liðsins og hann er að leika sína síðustu leiki á ferlinum, svo að félagar hans vilja eflaust tryggja honum sem lengsta veru í deildinni. Jermaine O´Neal er að snúa aftur úr erfiðum meiðslum og liðið verður að hafa hann í sínu besta formi í úrslitakeppninni, sem og Stephen Jackson sem er liðinu mikilvægur bæði sóknar- og varnarlega. Fyrsti leikur liðanna er á laugardagskvöld í Boston