Fjölskylda Skarphéðins vill minnast líffæragjafa

Aðstandendur Skarphéðins Andra Kristjánsson, sem lést í janúar í fyrra, hafa ákveðið að tileinka 29. janúar líffæragjöfum. Hann lést 28. janúar í fyrra og varð líffæragjafi daginn eftir. Móðir Skarphéðins segir mikilvægt að taka afstöðu til líffæragjafar.

„Þann 29. janúar 2014 fór af stað umræða í þjóðfélaginu um líffæragjöf. Umræðan varð bæði mun meiri en við, aðstandendur Skarphéðins Andra sem varð líffæragjafi þennan dag, gátum gert okkur í hugarlund sem og þarfari en við áttum von á.“

Þetta segir móðir Skarphéðins, Steinunn Rósa Einarsdóttir, fyrir hönd aðstandenda hans. Hægt er að taka afstöðu til líffæragjafar á vef Landlæknis.

Hún segir að á þessu eina ári hafi orðið veruleg breyting á viðhorfi til líffæragjafar og að umræðan hafi orðið mun opnari. Þá hafi aðstandendur líffæragjafa fundið fyrir létti með hve opin umræðan væri orðin

„Við höfum fengið bréf frá aðstandendum líffæragjafa, líffæraþegum sem bæði eru á biðlista og hafa fengið líffæri og einnig frá þeim sem misst hafa ættingja á biðlista. Við höfum líka hitt fólk í þessum hópum sem hafa þakkað og hvatt okkur áfram.“

Því hafi verið ákveðið að minna á líffæragjöf þann 29. janúar 2015. Einu ári eftir að Skarphéðinn lést og umræðan fór af stað. Tilgangur dagsins er að fjölga þeim sem taka afstöðu og til að minnast allra líffæragjafa sem gefið hafa mörgum líf og aukin lífsgæði.

„Hvetjum við fólk til að fara inn á síðu Landlæknis og skrá afstöðu sína hvort sem hún er jákvæð eða neikvæð. Litur dagsins er appelsínugulur og ætla margir að taka þátt í því að minna á líffæragjöf með því að skarta þeim lit þann 29. janúar. Má þar nefna stöðuverði sem ætla að ganga með appelsínugulan borða á handlegg sínum.“

Hér að neðan má sjá skjal sem sýnir hvernig skrá á afstöðu sína til líffæragjafar.

„Við vitum á eigin skinni hversu erfitt er að standa frammi fyrir því að missa nákominn og erum Skarphéðni okkar ævinlega þakklát fyrir að hafa verið búinn að taka afstöðu sem við komum til skila í stað þess að taka ákvörðun fyrir hann,“ segir Steinunn.