Diljá fengið hrós frá sundlaugarvörðum í öðrum sundlaugum

Kolbeinn Tumi Daðason skrifar 16. janúar 2017 10:40

Diljá Sigurðardóttir var bent á það í gær af sundlaugaverði að ekki væri free the nipple dagurinn. Akranes.is

Regína Ásvaldsdóttir, bæjarstjóri á Akranesi, segir ljóst að setja verði verklagsreglur er varðar notkun baðfatnaðar í sundlaugum bæjarsins svo að starfsfólk sé ekki sett í þá aðstöðu að þurfa að meta hvað megi og hvað ekki.

Diljá Sigurðardóttir, sundlaugargestur á Akranesi, var beðin um að klæða sig í topp þar sem hún var berbrjósta í lauginni. Bar starfsmaður sundlaugarinnar því við að borist hefði kvörtun vegna klæðaburðar hennar.

Var flökurt af stressi fyrst

Diljá var í viðtali í Bítinu á Bylgjunni í morgun og ræddi málið. Hún segir jafnréttisfræðslu skorta víða, alls ekki bara á Akranesi. Hún hafi oft farið í sundlaugar annars staðar og jafnvel fengið hrós frá sundlaugavörðum.

Hún vilji leggja sitt af mörkum í baráttunni, tók þátt í „Free the nipple“ árið 2015. „Ég vissi að ég yrði að taka þátt,“ segir Diljá en það hafi ekki verið auðvelt fyrst. Henni hafi orðið flökurt af stressi við tilhugsunina því henni hafi liðið eins og hún væri að gera eitthvað ótrúlega rangt.

Viðtalið við Diljá má heyra hér að neðan.

„Okkur finnst þetta bara mjög leitt að þessi uppákoma hafi orðið. Við viljum fara yfir þessa verkferla og móta reglur,“ segir Regína í samtali við Vísi.

Berbrjósta velkomnir í Reykjavík

Þórgnýr Thoroddsen, formaður Íþrótta- og tómstundaráðs Reykjavíkur, áréttaði á Facebook í gær að fólk væri velkomið í sundlaugar Reykjavíkur berbrjósta. Þó virðast ekki liggja fyrir reglur um klæðnað í sundlaugum að sögn Regínu.

„Ég hef aðeins verið að hlera og veit ekki um nein sveitarfélög sem eru með reglur,“ segir Regína sem hefur verið í samskiptum við aðra bæjarstjóra.

Reglurnar séu nauðsynlegar svo starfsfólk sé ekki sett í þessa stöðu eins og varð tilfellið á laugardaginn er brugðist var við kvörtun sundlaugagests, að sögn starfsmanns laugarinnar.

Regína segir að skóla- og frístundaráð Akranesbæjar muni taka málið fyrir.

Tæplega fjórtán þúsund lesendur Vísis hafa greitt atkvæði í könnun sem komið var á fót í gær. Þar var spurt hvort banna ætti konum að vera berar að ofan í sundi. 80 prósent svara neitandi en 20 prósent játandi. Þótt ekki sé um vísindalega könnun að ræða gefur hún vísbendingu um að ekki er algjör einhugur um málið.

Ingólfur vill árétta, sem margir hafa misskilið, að hann væri hvorki ósammála réttindabaráttunni né þeirrar skoðunar að konur ættu að vera í ákveðnum klæðnaði eða hylja sig.Vísir/Vilhelm

Tónlistarmaðurinn Ingólfur Þórarinsson velti upp þeirri spurningu í gær hvort möguleiki væri að breyta menningartengdum hugsunarhætti þegar hann myndi skarast á við eðlisfræðilega þætti. Brjóst væru kynferðislega örvandi.

Hann væri þó hvorki ósammála réttindabaráttunni né þeirrar skoðunar að konur ættu að vera í ákveðnum klæðnaði eða hylja sig.

Heldur ótrauð áfram berbrjósta

Diljá segir alveg ljóst að karlmenn fái ekki standpínu af því að sjá berbrjósta konur í sundlaugum. Hún skorar á konur að fara berbrjósta í laugina.

„Mér finnst brjóst ekki vera neitt til að skammast sín fyrir,“ segir Diljá. Hún upplifi það ekki þannig að starað sé á hana í sundlaugunum. Karlmannsbringa geti líka verið aðlaðandi en fólk stari ekkert.

Hún ætlar að halda ótrauð áfram að mæta í laugarnar berbrjósta.

Tengdar fréttir

Mest lesið

Fleiri fréttir