Björn dæmdur fyrir meiðyrði en sýknaður af miskabótakröfu

Hæstiréttur staðfesti í dag ómerkingu ummæla sem Björn Bjarnason viðhafði um Jón Ásgeir Jóhannesson í bókinni Rosabaugur yfir Íslandi. Hann var hins vegar sýknaður af bótakröfu.

Málið snýst um það að Jón Ásgeir höfðaði mál á hendur Birni og krafðist ómerkingu tiltekinna ummæla sem birtust um hann í bókinni, en bókin fjallaði Baugsmálið. Í bókinni fullyrti Björn að Jón Ásgeir hefði verið dæmdur fyrir fjárdrátt, en það er rangt. Eftir útgáfu bókarinnar hafði lögmaður Jóns Ásgeirs ritað bréf til Björns þar sem bent var á rangfærslur í bókinni að því er varðaði Jón Ásgeir og í kjölfarið birti Björn afsökunarbeiðni og leiðréttingu á heimasíðu sinni og í dagblaði auk þess sem texta bókarinnar var lítillega breytt í 2. prentun.

Í dómi Hæstaréttar kemur fram að ummæli þau sem ómerkt hefðu verið í héraðsdómi hefðu verið röng og óviðurkvæmileg og hefðu eintök bókarinnar ekki verið innkölluð. Var niðurstaða héraðsdóms um ómerkingu ummælanna því staðfest. Hæstiréttur féllst hins vegar ekki á kröfu Jóns Ásgeirs um miskabætur úr hendi Björns þar sem ekki yrði talið að ummælin, að teknu tilliti til leiðréttingar og opinberrar afsökunarbeiðni Björns og stöðu Jóns Ásgeirs og þátttöku hans í opinberri umræðu um málefnið, hefðu slík áhrif á persónu og æru Jóns Ásgeirs að fullnægt væri skilyrðum fyrir skaðabótakröfu. Þá var ekki fallist á kröfu Jóns Ásgeirs um að Björn greiddi honum kostnað vegna birtingar dóms í málinu.

Í dómnum segir: „Verður að telja að hin ómerktu ummæli hafi upphaflega verið sett fram vegna mistaka áfrýjanda. Verður ekki talið að hin ómerktu ummæli, að teknu tilliti til leiðréttingar og opinberrar afsökunarbeiðni áfrýjanda og stöðu stefnda og þátttöku hans í opinberri umræðu um málefnið, hafi slík áhrif á persónu og æru stefnda að fullnægt sé skilyrðum (...) til að dæma honum miskabætur úr hendi áfrýjanda.“

Héraðsdómur Reykjavíkur hafði dæmt Björn til að greiða Jóni samtals 400 þúsund krónur, í miskabætur og fyrir birtingu dómsins, auk þess sem Björn var dæmdur til að greiða Jóni Ásgeiri 500 þúsund krónur í málskostnað.