Innlent

Ósáttur við hávaða frá þyrlum

Ólafur Örn Haraldsson
Ólafur Örn Haraldsson
Hávaði frá þyrlum kann að grafa undan upplifun ferðamanna. Leiðsögumaður vill skýrar reglur. Meiri umferð fylgir eðlilega ónæði, segir þjóðgarðsvörður.



Þyrluferðir með ferðafólk í útsýnisflug og á valda áfangastaði hafa færst í vöxt síðustu ár. Steingrímur Gunnarsson leiðsögumaður segir hávaðamengun frá þyrlunum slíka að það eyðileggi upplifun annarra ferðamanna. Hann kallar eftir reglum um hversu nálægt megi fljúga þyrlunum og vill að lagt verði á þær sérstakt gjald fyrir hverja lendingu, sem runnið gæti til uppbyggingar og viðhalds á viðkomandi stöðum.

Steingrímur nefnir sérstaklega Geysi og Þingvelli sem vinsæla áfangastaði þar sem truflun sé af miklu þyrluflugi, en segir dæmin um leið fleiri. „Um daginn var ég með félögum mínum í Dyrhólaey við fuglaskoðun í kyrrðinni rétt fyrir níu að morgni. Þá heyri ég í þyrlu í fjarska sem mér til undrunar kom fljúgandi beint yfir til okkar. Kyrrðin var rofin og allur lundi rokinn út á sjó,“ segir hann og segir sífellt aukast ferðir hingað þar sem fólk sækir í friðinn og þögnina í náttúrunni. Þyrluflugið segir hann grafa undan þeim verðmæta markaði með hljóðmengun.

„Ég hef verið í leiðsögn síðan 1972 og hef fylgst með breytingum, mörgu til hins góða og svo öðru sem við þurfum að gæta okkar á. Við þurfum að halda í góðu kúnnana, þá sem gefa mest af sér,“ segir hann og kveður vítin til þess að varast þau. Þannig hafi Spánverjar farið flatt á því að meta árangur í ferðaþjónustu út frá því hversu margir gestir komu til landsins. „Árangurinn á meta út frá því hvað menn skilja eftir og þyrluflugið skemmir markaðinn þó að þeir sem kaupa flug borgi mikið fyrir það.“

Ólafur Örn Haraldsson, þjóðgarðsvörður á Þingvöllum, segir samstarf við þyrlufyrirtækin hafa verið gott. „Við höfum sett reglur sem þyrluflugmenn fara eftir um lendingar og komur til Þingvalla,“ segir hann, en þar fyrir utan gildi venjulegar flugreglur á svæðinu.

„Það er hins vegar alveg rétt að þær raddir hafa heyrst frá friðlýstum svæðum víða, sérstaklega hér sunnan- og suðvestanlands, að mönnum þyki hafa verið mikill vöxtur í þessu þyrluflugi og mönnum þykir ónæði af þessu.“

Ólafur segir rétt að hluti af gildum og gæðum þjóðgarðsins sé að þar ríki friður og ró, en sá friður hafi vitanlega verið rofinn að hluta með aukinni umferð, hvort sem þar sé um að ræða bíla eða önnur farartæki.olikr@frettabladid.is



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×