Innlent

Kræklingaræktin skilar peningum

Kræklingar eru farnir að skila peningum i kassann.
Kræklingar eru farnir að skila peningum i kassann.
Kræklingaræktin er loks eftir tíu ára þróunarstarf farin að skila stórum peningum, segja ráðamenn Norðurskeljar í Hrísey, sem flytja nú meira út í hverri viku en þeir gerðu allt árið í fyrra, og hafa ekki undan pöntunum.

Hjá Norðurskel byrjuðu menn fyrir áratug að prófa sig áfram kræklingarækt og þeir eru komnir lengst allra hérlendis í þessari nýju atvinnugrein, sem virðist lofa mjög góðu. Fyrirtækið er nú búið að setja upp vinnslu í Hrísey og kaupa tvo nýja báta. Átta manns eru komnir í vinnu og nauðsynlegt að ráða fleiri því það er brjálað að gera, að sögn Gísla Rúnars Víðissonar vinnslustjóra. Kræklingurinn, eða bláskelin, er flutt lifandi út í skelinni til kaupenda með skipum og flugvélum. Milli 2.500 og 3.000 kíló fara nú út í hverri viku, aðallega til Belgíu, en kaupandi þar vill fá 6.000 kíló á viku, þannig að Norðurskel annar hvergi nærri eftirspurn.

„Þetta þýðir að peningarnir streyma inn, við erum rétt að byrja núna að sjá stóra peninga," segir Gísli Rúnar, en tekur fram að það sé loks að gerast eftir tíu ára þróunarstarf. Fjöldi annarra aðila víða um land, sem einnig eru komnir af stað, hafa leitað ráðgjafar hjá Norðurskel og er því spáð að kræklingarækt geti á næstu árum skapað mörghundruð ný störf hérlendis.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×