Lætur reyna á stjórnarskrá vegna Vítisengla

Dómsmálaráðherra Danmerkur ætlar ekki að kanna hvort hægt sé að beita stjórnarskránni til þess að banna starfsemi mótorhjólaklúbba á borð við Vítisengla. Dómsmálaráðherrann hér á landi vill hinsvegar láta reyna á íslensku stjórnarskrána.

Lars Barfoed dómsmálaráðherra Danmerkur byggir þessa niðurstöðu sína á skýrslu sem embætti Ríkislögmanns og Ríkislögreglustjórans unnu. Markmiðið var að kanna hvort hægt væri að sýna fram á að gengin væru hættuleg og glæpastarfsemi væri markmið þeirra.

Í grófum dráttum eru niðurstöður skýrsluhöfunda þær að einungis sé hægt að leysa upp slík glæpasamtök ef búið er að sanna að það sé markviss stefna þeirra að vinna að glæpum eða ofbeldi. Í skýrslunni kemur jafnframt fram að það leiki umtalsverður vafi á því hvort hægt sé að færa fram slíkar sannanir gegn tilteknum klúbbum.

Ragna Árnadóttir, dómsmálaráðherra, segir að það komi sér á óvart að dönsk stjórnvöld telji að viðkomandi samtök þurfi að vera búin að koma sér fyrir og hefja starfsemi sem þurfi að vera ólögmæt. „Það er virkilega athyglisvert að heyra að Danir telji að það sé ekki hægt að banna þetta fyrir en skaðinn er skeður."

Ragna segir yfirvöld hafa þungar áhyggur af þeirri staðreynd að Ísland sé hugsanlega að verða hluti af alþjóðlegu glæpasamfélagi.

„Þess vegna höfum við verið að kanna allar mögulegar leiðir til þess að koma í veg fyrir þetta," segir Ragna. Stjórnvöld hafi kannað hvort það sé möguleiki fyrir þau að leysa upp félag með ólögmætum tilgangi líkt og stjórnarskráin geri ráð fyrir. „Við viljum láta á þetta reyna vegna þess að við getum ekki setið aðgerðarlaus og horft upp á þetta."