Litlu munar á 4. til 7. sæti

Bjarni Karlsson, frambjóðandi í prófkjöri Samfylkingarinnar, segist vera ákaflega sáttur við þann stuðning sem hann fær í prófkjörinu. Þegar fyrstu tölur voru birtar var Bjarni í fimmta sæti en þegar þær voru birtar í annað sinn hafði hann haft sætaskipti við Dofra Hermannsson, varaborgarfulltrúa, sem var í sjötta sæti.

Bjarni segir að fáum atkvæðum muni á milli sín, Dofra, Hjálmars Sveinssonar og Sigrúnar Elsu Smáradóttur. Hjálmar er í fjórða sæti og Sigrún Elsa því sjöunda. Bjarni segir að 8 atkvæðum muni milli sín og Sigrúnar Elsu og fjórum milli sín og Dofra.

„Ég er þakklátur fyrir það traust sem mér er sýnt. Þarna er að byggjast upp sterkur og frambærilegur listi. Ég er stoltur að vera hluti af þessari liðsheild," segir Bjarni sem hefur undanfarin ár gegnt stöðu sóknarprests í Laugarneskirkju.

„Ég ákvað að gefa samfélaginu færi á mér. Ég er í starfi sem mig langar ekki til að standa upp úr en ef að svo fer að ég verði kjörinn borgarfulltrúi mun ég kveðja preststarfið í fjögur ár og þjóna borgurunum með þessum hætti."

Bjarni vonar að kosningabaráttan verði jákvæð og uppbyggileg og að hún komi til með að snúist um að bjóða borgarbúum upp á lausnir. „Nú ríður á að við högum kosningabaráttunni og orðræðunni í kringum hana þannig að við eflum samstöðu borgarbúa almennt og séum lausnarmið og jákvæð í hugsun."