Tilraun til að nýta gulldeplu sem aðalfóður í þorskeldi

14. desember 2009 06:00

gulldepla Gulldepla er lítill fiskur af silfurfiskaætt. Hún er 5-8 sentimetra löng. Hún er miðsjávarfiskur sem finnst frá yfirborðinu niður í allt að 1.500 metra dýpi en er algengust á 150-250 metrum um nætur en við 50 metra á daginn. Hún er algengust í heittempruðum sjó í Norður- og Suður-Atlantshafi og lifir á rauðátu. Gulldepla finnst allt í kringum Ísland.

Hraðfrystihúsið Gunnvör í Hnífsdal gerði í fyrravetur tilraun til að nýta gulldeplu sem fóður í áframeldi á villtum þorski. Tilraunin gafst það vel að hugmyndir eru uppi um að leggja áherslu á gulldeplu sem fóður og Álfsfell, annað þorskeldisfyrirtæki í Djúpinu, hefur bæst við. Huginn VE frá Vestmannaeyjum ætlar að frysta 500 tonn fyrir jól, gefi á sjó.

Þessi nýting gulldeplunnar sætir nokkrum tíðindum í því ljósi að fisktegundin var ekki veidd hér við land fyrr en loðnuvertíð brást og uppsjávarskipin þurftu að leita sér nýrra verkefna í fyrra, segir Einar Valur Kristjánsson, framkvæmdastjóri Gunnvarar. Hann segir tilraunina í fyrra hafa staðfest að þorskur í áframeldi taki gulldepluna sem fóður. Það hafi verið fyrsta skrefið. Hins vegar sé ekki enn þá hægt að fullyrða um hversu gott fóður hún sé í samanburði við loðnu, síld og fiskúrgang sem nýtt hafi verið hingað til. „Þetta er mjög spennandi, sérstaklega ef hægt er að landa þessu beint til okkar, en það er einmitt hugmyndin,“ segir Einar.

Við áframeldi á þorski er eins til tveggja kílógramma þorskur veiddur og færður lifandi í sjókvíar. Þar er hann alinn í nokkra mánuði og síðan slátrað. Þá hefur hann oft tvöfaldað þyngd sína. Um lítið magn er að ræða á landsvísu, eða um 500 tonn hjá þeim fyrirtækjum sem þetta eldi stunda.

Einar segir að í áframeldið noti fyrirtækið á milli eitt og tvö þúsund tonn á ári. „Við verðum að vita hvað við erum með í höndunum en ef vel gengur skiptum við út öðru fóðri fyrir þetta. Það er líka ánægjulegt að vinna með mönnum sem vilja gera meira með hráefnið en selja það allt í bræðslu.“

Guðmundur Huginn Guðmundsson, skipstjóri á Huginn VE, segir hafa staðið til að veiða 500 tonn af gulldeplu í fóður en brælur hafi ekki leyft það hingað til. „Það stóð til að landa þessu fyrir vestan. Þeir vilja sjá hvernig fiskurinn dafnar af þessu. Ef það er í lagi vilja þeir fá nokkur þúsund tonn til viðbótar.“

Huginn segir gulldepluna vera spikfeitan fisk sem hljóti að henta vel í fiskeldi. „Hann er líka svo smávaxinn að hann er ábyggilega þægilegur munnbiti fyrir þorskinn.“

svavar@frettabladid.is

Mest lesið

Fleiri fréttir