Átta handteknir fyrir ránið á Actic Sea

Rússar hafa handtekið átta menn fyrir að ræna flutningaskipinu Arctic Sea. Skipið hvarf á Ermarsundi fyrir nærri þremur vikum.

Rússneski flotinn fann í dag flutningaskipið Arctic Sea nærri Grænhöfðaeyjum. Fimmtán manna rússnesk áhöfn reyndist heil á húfi. Skipinu var siglt af stað þann 23. júlí síðastliðinn undir maltverskum fána með timburfarm frá Finnlandi sem flytja átti til Alsír. Farmurinn var metinn á jafnvirði nærri hundrað og sjötíu milljóna íslenskra króna.

Nokkrum dögum eftir að siglt var af stað greindu finnskir eigendur Arctic Sea að þeim hefði borist tilkynning frá skipstjóra um að tíu vopnaðir menn hefðu ráðist um borð og haldið áhöfn í gíslingu í hálfan sólahring en síðan hafi mennirnir farið frá borði. Þeir voru sagðir hafa leitað eiturlyfjafarms um borð. Síðan hvarf skipið af ratsjá. Misvísandi upplýsingar bárust um staðsetningu þess eftir það. Ekkert samband hafði náðst við skipið í tæpar þrjár vikur. Ýmsar tilgátur voru uppi um örlög skipsins og skipverja. Líklegast var þó talið að skipinu hefði verið rænt.

Um liðna helgi var tilkynnt að finnskum eigendum skipsins hefði borist lausnargjaldskrafa en ekki var vitað hvort hún var frá einhverjum sem í raun hefðu skipið á sínu valdi. Fregnir bárust síðan af því að skipið hefði sést nærri Grænhöfðaeyjum. Í gær var svo staðfest að Rússneski sjóherinn hefði fundið skipið.

Í morgun hafði síðan rússneksa Itar-Tass fréttastofan eftir Anatoly Serdyukov, varnarmálaráðherra Rússlands, að átta menn hefðu verið handteknir fyri að ræna skipinu.

Tveir Rússar, tveir Lettar og fjórir Eistar hafi komið um borð í sænskri landhelgi aðeins degi eftir að skipinu var siglt frá Finnlandi. Þeir hafi logið því til að báturinn þeirra væri bilaður. Þegar um borð hafi verið komið hafi mennirnir átta dregið upp vopn og fyrirskipað að skipinu skyldi siglt til Afríku. Síðan hafi þeir slökkt á siglingatækjunum um borð.