Gripu til vopna eftir Facebookdeilur

Búið er að sleppa piltunum fjórum sem grunaðir eru um að hafa ógnað manni sem var við vinnu sína í Höfðahverfi í Reykjavík með skotvopni.

Lögregla fékk tilkynningu um athæfi mannanna klukkan hálftíu á fimmtudagskvöld, en fjórir lögreglubílar umkringdu mennina um korteri síðar eftir greinagóða lýsingu fórnarlambsins á farartækinu.

Voru mennirnir færðir á lögreglustöð og skotvopnið, sem reyndist lítill riffill, gert upptækt. Vopnið var ekki hlaðið, en skotfæri fundust í bílnum.

Mennirnir fjórir eru á aldrinum 17 til 22 ára. Þeir voru ekki undir áhrifum áfengis eða fíkniefna og hafa aldrei komið við sögu lögreglu áður. Ekki var farið fram á gæsluvarðhald yfir piltunum, en þeim var sleppt eftir yfirheyrslur á föstudag.

Við yfirheyrslur kom í ljós að ekki var um tilviljanakenndan hrekk að ræða, heldur töldu mennirnir sig eiga eitthvað sökótt við fórnarlambið eftir orðaskak á Facebook.