Kolbrún Halldórsdóttir: Tilbúin að gegna ráðherraembætti áfram

Kolbrún Halldórsdóttir er tilbúin að gegna embætti umhverfisráðherra áfram en segir að það sé annarra en hennar að ákveða framtíð hennar í ráðherrastóli. Hún segir að vel megi vera að ummæli hennar um olíunýtingu á Drekasvæðinu hafi ráðið því að hún náði ekki kjöri á Alþingi í kosningunum á laugardag.

Kolbrún Halldórsdóttir umhverfisráðherra lýsti andstöðu sinni við að farið yrði í að bora eftir olíu á Drekasvæðinu, leiddu rannsóknir í ljós að þar væri olía í nýtanlegu magni, í viðtali á Stöð 2 miðvikudaginn fyrir kosningar. Hún náði ekki endurkjöri til Alþingis í kosningunum á laugardag og almennt var fylgi Vinstri grænna minna en kannanir höfðu sýnt í vikunni fyrir kosningar. Ríkisstjórnin kom saman í morgun til síns fyrsta fundar að loknum kosningum.

Kolbrún segist ekki klók í að skýra pólitíska stöðu þannig að hún kunni ekki skýringar á því að hún náði ekki inn á þing. Flokkurinn hafi fengið tuttugu og tveggja prósenta fylgi í hennar kjördæmi í Reykjavík suður og hún telji að kosningalögin eigi sinn þátt í hvernig fór.